Süni intellekt texnologiyalarının sürətli inkişafı rəqəmsal məzmun istehsalını kəmiyyət baxımından asanlaşdırsa da, keyfiyyət və davamlılıq məsələlərini daha da kəskinləşdirir. Son dövrlər aparılan araşdırmalar göstərir ki, qısa video platformalarında süni intellektlə yaradılan, minimal yaradıcılıq səyi tələb edən və əsasən diqqət cəlb etməyə yönəlmiş məzmunun payı sürətlə artır. Bu tendensiya rəqəmsal ekosistemdə dəyər anlayışının dəyişməsi ilə yanaşı, platformaların iqtisadi və institusional balansına da təsir göstərir.
Yeni istifadəçi davranışlarının təhlili göstərir ki, qısa videoların əhəmiyyətli hissəsi orijinal ideyaya söykənməyən, təkrarlanan vizuallardan və avtomatik generasiya olunmuş səslərdən ibarətdir. Bu cür məzmunun alqoritmik üstünlük qazanması, uzunmüddətli istehsal prosesi tələb edən peşəkar kontent yaradıcılarının görünürlüyünü azaldır. Qlobal miqyasda aparılan araşdırmalar süni intellekt vasitəsilə kütləvi şəkildə istehsal olunan videoların bəzi ölkələrdə milyonlarla dollar gəlir gətirdiyini göstərir ki, bu da rəqəmsal platformalarda gəlirin daha çox miqyas və sürət üzərindən formalaşdığını nümayiş etdirir.
Bu prosesin əsas səbəblərindən biri platforma alqoritmlərinin istifadəçi diqqətini maksimum saxlamağa yönəlməsidir. Qısa, emosional reaksiya doğuran və tez istehlak olunan videolar daha çox tövsiyə edilir, halbuki məzmunun dərinliyi və informativ dəyəri ikinci plana keçir. Nəticədə rəqəmsal məkan yaradıcılıq üçün platforma olmaqdan tədricən diqqət iqtisadiyyatının mexanizminə çevrilir. Bu transformasiya reklam bazarına da təsirsiz ötüşmür. Reklamçılar üçün əsas risk brend mesajlarının keyfiyyətsiz və mənasız məzmunla eyni mühitdə yerləşməsidir ki, bu da platformaya olan etimadı zəiflədə bilər.
Mövcud vəziyyət platformalar üçün institusional seçim mərhələsi yaradır. Bir tərəfdən süni intellekt alətləri məzmun istehsalını demokratikləşdirir və giriş baryerlərini azaldır, digər tərəfdən isə dəyər yaradan peşəkar kontentin iqtisadi motivasiyasını zəiflədir. Qlobal təcrübədə bəzi platformalar artıq süni intellektlə yaradılmış məzmunun etiketlənməsi, tövsiyə alqoritmlərində fərqləndirilməsi və ya monetizasiya qaydalarının yenidən qurulması istiqamətində addımlar atır.
