Rəsmi İrəvan Bakı ilə birbaşa ticarət imkanlarını müzakirə etdiyini açıqlayıb...
Poliqon xəbər verir ki, Ermənistanın xarici işlər naziri Ararat Mirzoyan ölkənin İctimai Televiziyasının efirində çıxışı zamanı Ermənistanın Azərbaycanla birbaşa ticarət məsələsini müzakirə etdiyini bildirib. Nazir qeyd edib ki, xüsusilə Azərbaycan istehsalı olan benzinin alınması Ermənistan vətəndaşları üçün faydalıdır.
Mirzoyanın sözlərinə görə, bəzi dairələr tərəfindən Azərbaycan məhsullarının boykotuna çağırışlar edilsə də, reallıq bunun əksini göstərir.
“Boykot çağırışlarını görmüşəm, amma eyni zamanda öyrəndim ki, Azərbaycan benzini almaq üçün növbələr də var”, deyə nazir vurğulayıb.
Ermənistan XİN rəhbəri bildirib ki, bu fakt iqtisadi baxımdan daha sərfəli alternativlərin və bazar mexanizmlərinin vətəndaşların gündəlik seçimlərinə təsir etdiyini göstərir. Onun fikrincə, regionda iqtisadi əlaqələrin qurulması və ticarətin genişlənməsi sıravi insanların maraqlarına xidmət edə bilər.
Mirzoyanın bu açıqlaması Ermənistan cəmiyyətində və siyasi dairələrdə geniş müzakirələrə səbəb olub. Ekspertlər hesab edirlər ki, bu cür bəyanatlar Bakı–İrəvan münasibətlərində iqtisadi gündəliyin tədricən ön plana çıxmasına işarə edir.
Poliqon.info
