Bakı, 25 dekabr, AZƏRTAC
2026-cı ildә pul siyasәti mövcud rejim çәrçivәsindә hәyata keçirilәcәk. Proqnozlara görә növbәti ildә tәdiyә balansının cari әmәliyyatlar hesabının profisitli olması valyuta bazarında tarazlığı dәstәklәyәcәk.
AZƏRTAC Mərkəzi Banka istinadla xəbər verir ki, baza ssenari üzrә proqnozlara görә 2026-cı ildә cari әmәliyyatlar hesabının profisiti 3 milyard dollar sәviyyәsindә olmaqla ÜDM-in 3,7 faizi sәviyyәsindә gözlәnilir. Mәrkәzi Bank növbәti ildә dә özünün valyuta ehtiyatlarının kifayәtlilik meyarlarına uyğun saxlanılmasını vә onun idarә edilmәsinin tәkmillәşdirilmәsini diqqәtdә saxlayacaq.
Pul siyasәti alәtlәrinin tәtbiqi zamanı maliyyә bazarlarında baş verәn proseslәr vә bank sisteminin likvidlik mövqeyindәki dәyişikliklәr nәzәrә alınacaq. Alәtlәrin istifadәsi pul siyasәtindәn kәnar amillәrin monetar şәraitә tәsirlәrinin neytrallaşdırılmasına xidmәt edәcәk.
Mәrkәzi Bankda tәhlil vә proqnozlaşdırma potensialının artırılması 2026-cı ildә dә diqqәtdә saxlanılacaq. Proqnozlaşdırma vә siyasәt tәhlili sistemi çәrçivәsindә model aparatı qabaqcıl beynәlxalq tәcrübәlәr әsasında mütәmadi tәkmillәşdirilәcәk, tәdqiqatların әhatә dairәsi vә analitik dәrinliyi artırılacaq. Pul siyasәti qәrarlarının qәbulunda nәzәri әsaslara söykәnәn vә ekonometrik baxımdan adekvat model nәticәlәrindәn istifadә artırılacaq.
