Həqiqətən müdrik bir partnyor olduğunuzun əlamətləri çox vaxt sözlərlə deyil; sükuta, qeyri-müəyyənliyə və ya emosional gərginliklərə necə reaksiya verməyinizlə üzə çıxır. Psixoloq Mark Travers "Psychology Today" üçün yazdığı məqalədə bildirir ki, ağıllı partnyorlar qarşı tərəfin əhvalındakı hər dəyişikliyi şəxsi təhdid kimi qəbul etmir, əksinə, bir addım geri çəkilib vəziyyətə geniş bucaqdan baxmağı bacarırlar.
Milli.Az münasibətdə müdrikliyin 3 əsas göstəricisini təqdim edir:
Öz düşüncələrini idarə etmək bacarığı
Müdrik partnyor bilir ki, insan beyni bəzən reallığı təhrif edə bilər, buna görə də hər emosional reaksiyasına kor-koranə inanmır. Koqnitiv çeviklik sayəsində belə insanlar bir hadisə ilə bağlı tələsik nəticə çıxarmır, bir neçə mümkün izahı nəzərdən keçirirlər. "Current Psychology" jurnalında dərc olunan araşdırmaya görə, bu bacarıq sadəcə münaqişələri azaltmır, həm də cütlüklər arasındakı yaxınlığı artırır.
Reaksiya verməzdən əvvəl sakitləşmək
Partnyorunuz sizdən uzaqlaşdıqda bədəniniz panika ilə reaksiya verə bilər. Lakin müdrik partnyorlar fiziki siqnallara (gərginlik, nəfəs alıb-vermə, duruş) diqqət yetirərək idarəetməni yenidən ələ almağı bacarırlar. Onlar yalnız bədənləri tam sakitləşdikdən sonra cavab verməyi və ya hərəkətə keçməyi öyrənmiş insanlardır.
Partnyoru müstəqil bir fərd kimi görmək
Psixoloqlar bunu "mentalizasiya" adlandırırlar - yəni partnyorun daxili dünyasını, qayğılarını və hisslərini özününkündən ayıra bilmək. Bu, "emosional birləşmənin" qarşısını alır; belə ki, bir tərəfin neqativ enerjisi avtomatik olaraq digərinə keçmir. Emosional cəhətdən yetkin insanlar anlayırlar ki, empatiya qurmaq özünü qarşı tərəfin içində itirmək deyil, öz mənliyini qoruyaraq diqqətli anlayış göstərməkdir.
Lalə Qüdrətova
Milli.Az
