Dekabrın 23-dən 24-nə keçən gecə Rusiyanın paytaxtı Moskva şəhərinin cənubundakı Orexovo-Borisovo rayonundakı Yeletskaya küçəsindəki polis bölməsinin yaxınlığında ölümlə nəticələnən partlayış baş verib.
Xezerxeber.az yerli mediaya istinadən xəbər verir ki, yol-patrul xidməti avtomobilində əldəqayırma partlayıcı qurğu partlayıb.
İlkin məlumatlara görə, həmin qurğu sərnişin oturacağı tərəfdən avtomobilin altında yerləşdirilib. Partlayış nəticəsində 2 polis əməkdaşı həlak olub, daha 2-si ağır yaralanıb, onlar xəstəxanaya yerləşdiriliblər.
Rusiya İstintaq Komitəsi hüquq-mühafizə orqanlarının əməkdaşlarına qarşı sui-qəsd cəhdi ilə bağlı cinayət işi açıb. Hadisə ilə əlaqədar şübhəlilərin axtarışı aparılır, kamera görüntüləri araşdırılır və şahidlər dindirilir.
10:14
Moskvada partlayış nəticəsində ölən üçüncü şəxsin kimliyi məlum olub.
Xezerxeber.az Rusiya mətbuatına istinadən xəbər verir ki, o, partlayışı törədən şəxs olub.
O, polis əməkdaşlarının yaxınlığında əldəqayırma partlayıcı qurğunu işə salıb.
Təxminən saat 01:30-da iki DYP əməkdaşı xidməti avtomobilin yanında şübhəli bir kişini görüblər. Yoxlama aparmaq üçün ona yaxınlaşdıqları anda partlayıcı qurğu işə düşüb. Hər iki müfəttiş və cinayəti törədən şəxs hadisə yerində həyatını itirib.
10:03
Moskvanın Yeletskaya küçəsində yol polisinə məxsus xidməti avtomobilin yaxınlığında partlayış baş verib.
Xezerxeber.az xəbər verir ki, bu barədə Rusiya mediası məlumat yayıb.
İlkin məlumata görə, hadisə nəticəsində üç nəfər həlak olub, onlardan ikisi polis əməkdaşıdır. Ölənin partlayışı törədən şəxsin özü, yoxsa yoldan keçən başqa birinin olması ilə bağlı məlumatlar araşdırılır. İki nəfər isə ağır yaralanaraq hadisə yerindən birbaşa xəstəxanaya çatdırılıb.
Məlumata əsasən, xidməti avtomobilin yanında əl istehsalı partlayıcı qurğu işə düşüb. Partlayışdan sonra avtomobilin üzərində və asfalt örtüyündə çoxsaylı qəlpə izləri aşkarlanıb. Versiyalardan birinə görə, partlayıcı qurğunu naməlum şəxslər polis maşınına atıblar.
Ərazidə istintaq qrupu işləyir. Videomüşahidə kameralarının görüntüləri götürülür, şahidlərin ifadələri toplanır. Faktla bağlı cinayət işi başlanıb, hücumda iştirak edən şəxslərin müəyyənləşdirilməsi və axtarışı aparılır.
