Karakasın fikrincə, region və beynəlxalq təhlükəsizlik üçün əsas risk Vaşinqtondan qaynaqlanır...
Poliqon xəbər verir ki, Venesuelanın BMT-dəki daimi nümayəndəsi Samuel Monkada Təhlükəsizlik Şurasının iclasında çıxışı zamanı bəyan edib ki, dünya üçün təhlükə Karakasdan deyil, ABŞ hökumətindən gəlir. Onun sözlərinə görə, Venesuela beynəlxalq sülh və sabitliyə təhdid yaratmır, əksinə, bu riski ABŞ administrasiyasının siyasəti formalaşdırır.
Monkadanın açıqlaması ABŞ-nin BMT-dəki daimi nümayəndəsi Mayk Uoltsun daha əvvəl səsləndirdiyi fikirlərə cavab kimi qiymətləndirilir. Uolts Venesuela prezidenti Nikolas Maduronun siyasətini region üçün və ABŞ-nin milli təhlükəsizliyi baxımından “fövqəladə təhlükə” adlandırmışdı.
“Dünya bilməlidir ki, təhdid Venesuela deyil. Təhdid indiki ABŞ hökumətidir”, deyə Samuel Monkada Təhlükəsizlik Şurasındakı çıxışında vurğulayıb.
Diplomatın bu sərt bəyanatı ABŞ-nin Karib regionunda hərbi fəallığının artdığı bir vaxta təsadüf edir. The Wall Street Journal nəşrinin yazdığına görə, Vaşinqton son dövrlərdə Karib hövzəsinə xeyli sayda xüsusi təyinatlı hərbi təyyarə, qoşun və hərbi texnika yerləşdirib. Bu addımlar ABŞ-nin regionda potensial hərbi əməliyyat imkanlarını əhəmiyyətli dərəcədə genişləndirir.
Ekspertlərin fikrincə, Karib hövzəsində ABŞ hərbi mövcudluğunun gücləndirilməsi Vaşinqton və Karakas arasında münasibətlərin daha da gərginləşdiyini göstərir və bu vəziyyət regionda təhlükəsizlik balansına birbaşa təsir edə bilər.
Poliqon.info
