ABŞ Ədliyyə Nazirliyinin açıqladığı sənəd Epşteyn işi ilə bağlı qlobal müzakirələri daha da dərinləşdirib...
Poliqon xəbər verir ki, ABŞ Ədliyyə Nazirliyi tərəfindən ictimaiyyətə açıqlanan Ceffri Epşteynə aid məktub qısa müddət ərzində aparıcı dünya mediasının əsas mövzularından birinə çevrilib. The New York Times, The Guardian, The Washington Post, CNN, BBC, Der Spiegel və digər nüfuzlu nəşrlər sənədin məzmununu geniş təhlil edərək onun ABŞ siyasi elitası və cinsi istismar qalmaqalları ilə bağlı mümkün nəticələrinə diqqət çəkiblər.
Söhbət Epşteynin ABŞ gimnastika üzrə olimpiya yığmasının sabiq həkimi Lerri Nassara ünvanladığı məktubdan gedir. Nassar 2017-ci ildə 265 qadın idmançıya qarşı törədilmiş çoxsaylı cinsi zorakılıq cinayətlərinə görə 175 il həbs cəzası alıb və bu iş ABŞ tarixinin ən böyük idman qalmaqallarından biri hesab olunur. Epşteyn məktubunda Nassara “qısa yolu seçdiyini” yazaraq, onların guya “ortaq baxışlara” sahib olduqlarını iddia edir.
Məktubun mətnində Epşteyn və Nassarın gənc qızlara münasibəti təhrif olunmuş, manipulyativ və açıq şəkildə cinayət xarakterli ifadələrlə təqdim olunur. Beynəlxalq ekspertlər bu dili “istismarı normallaşdırmağa cəhd” kimi qiymətləndirir və sənədin psixoloji portret baxımından da son dərəcə təhlükəli məzmun daşıdığını vurğulayırlar.
Dünya mediasında ən böyük rezonans doğuran məqam isə məktubda ABŞ-nin keçmiş prezidenti Donald Tramp haqqında səsləndirilən iddialardır. Epşteyn yazıda Trampın gənc və cazibədar qadınlara xüsusi maraq göstərdiyini, ictimai yerlərdə isə onlara qarşı yolverilməz fiziki davranışlar etdiyini iddia edir. Bir sıra beynəlxalq nəşrlər qeyd edir ki, bu fikirlər Trampın adı ilə bağlı daha əvvəl mediada yer alan qalmaqallı açıqlamalar və iddialarla üst-üstə düşür, lakin məktubun özü birbaşa hüquqi sübut statusu daşımır.
Analitiklərin fikrincə, sənədin açıqlanması Epşteyn işi üzrə gizli saxlanılan əlaqələr şəbəkəsinə dair yeni suallar doğurur. Xüsusilə də ABŞ siyasi, maliyyə və şou-biznes elitasının müəyyən nümayəndələrinin Epşteynlə münasibətlərinin hansı səviyyədə olduğu yenidən müzakirə predmetinə çevrilib. Bir çox beynəlxalq hüquqşünas və insan haqları təşkilatı bu cür sənədlərin tam şəkildə açıqlanmasının vacibliyini vurğulayır.
ABŞ Ədliyyə Nazirliyi isə bildirir ki, Epşteyn işi ilə bağlı arxiv materiallarının mərhələli şəkildə dərc olunması davam edəcək. Mütəxəssislər hesab edirlər ki, yeni sənədlər təkcə konkret şəxslər barədə deyil, eyni zamanda yüksək dairələrdə uzun illər toxunulmaz qalmış sistemli cinsi istismar problemləri barədə daha dolğun mənzərə yarada bilər.
Poliqon.info
