Beynəlxalq Futbol Federasiyası (FİFA) Səudiyyə Ərəbistanının “Əl-Nəsr” klubuna tətbiq edilən transfer qadağasını ləğv edib.
90deqiqe.Az xəbər verir ki, bu barədə jurnalist və insayder Fabrisio Romano “X” sosial şəbəkəsində məlumat yayıb.
Mənbənin bildirdiyinə görə, FİFA “Əl-Nəsr”in bütün öhdəlikləri yerinə yetirdiyini təsdiqləyib və klubla bağlı iş bağlanıb.
Qeyd edək ki, daha əvvəl KİV-də yayılan məlumatlara əsasən, transfer qadağası “Əl-Nəsr”in 2023-cü ildə mərkəz müdafiəçisi Emerik Laportun transferinə görə “Mançester Siti”yə olan borcu səbəbindən tətbiq olunmuşdu. Bildirilirdi ki, Səudiyyə klubu “şəhərlilər”ə təxminən 9 milyon avro ödəməyib və borcun qaytarılma müddəti 31 avqustda başa çatıb.
Xatırladaq ki, Emerik Laport ötən payız “Əl-Nəsr”dən “Atletik” (Bilbao) klubuna transfer olunub. Hazırda “Əl-Nəsr”in heyətində beşqat “Qızıl top” mükafatı sahibi Kriştianu Ronaldo çıxış edir.
