ABŞ Prezidenti Donald Trampın Böyük Britaniyada nüvə silahı yerləşdirmək niyyətində olduğu bildirilir.
AzPost xəbər verir ki, bu barədə Daily Mail nəşri məlumat yayıb. Mənbələrin iddiasına görə, Tramp Böyük Britaniyanı yeni nüvə start meydançasına çevirməyi planlaşdırır. Ekspertlərin hesablamalarına əsasən, bu təşəbbüs ABŞ-a təxminən 264 milyon dollara başa gələ bilər.
Məlumatda qeyd olunur ki, plan çərçivəsində Kral Hərbi Hava Qüvvələrinə məxsus bazaların ölkənin kənd ərazilərində yerləşdirilməsi nəzərdə tutulur. Bunun üçün mövcud tikililərin sökülməsi və onların yerində strateji obyektlərin inşa edilməsi tələb oluna bilər. Bildirilir ki, həmin ərazilərdə azı 200 amerikalı hərbçinin yerləşdirilməsi planlaşdırılır.
Bu addım ABŞ-ın nüvə silahlarının Böyük Britaniyaya tam miqyaslı şəkildə geri qaytarılması kimi qiymətləndirilə bilər. Qeyd edək ki, Amerika nüvə silahları Böyük Britaniyadan 17 il əvvəl, Barak Obamanın prezidentliyi dövründə çıxarılmışdı.
Eyni zamanda vurğulanır ki, ABŞ-a məxsus nüvə silahlarının Böyük Britaniyaya gətirilməsi bir neçə il çəkə bilər. Buna səbəb isə hazırda mövcud olan hərbi bazaların bu tip silahların yerləşdirilməsi üçün uyğun vəziyyətdə olmamasıdır.
