ain.az, Yeniazerbaycan saytına istinadən bildirir.
Yüz yaşını qeyd edir
Vaxt var idi birdən yüzəcən saya bilmirdi heç;
Rəqəmləri tanımırdı,
Birin arxasına sıfırlar qoya bilmirdi heç –
İndi gör nə qədər sıfır daldа qalıb...
Üzündə yüz illik qırış,
Gözlərində yüz ilin göz yaşı var –
Ad günündə eşitdiyi arzuları
Ondan qabaq Göy eşidib –
Adının yüz yaşı var,
Təvəllüdün unudan qadının yüz yaşı var...
Evin bir tərəfində doğmaların şəkilləri,
Bir tərəfində tənhalıq asılıb –
Şəklin tənhalığı...
Bu qadın dərd qadındı,
Bəlkə də, onun haqqında yazılıb:
“Yüz ilin tənhalığı...”
***
Allahım, həyatıma
təkrar baxmaq istəyirəm –
Barmağınla dala çək,
Kadrlar başa dönsün...
Ayrılıq da cüt olsun –
Sevənlər qoşa getsin,
Gedənlər qoşa dönsün...
Mənə yüz yaş arzulayan,
Görüm dilindən çıxıb
ətəyindən yapışsın –
Tanrı qəbul etməsin,
Duam qarğışa dönsün...
Deyirlər, cahan düzəlir:
İnsan ömrü olacaq
Daş dövründəki kimi –
İnanan daşa dönsün...
Tələsən geclik
Mən elə bir adamam –
əgər dünya dağılsa,
Hamıdan tez bilərəm,
hamıdan gec tərpənərəm...
Mən elə bir adamam –
ölüm mələyi gəlsə,
Hamıdan tez qarşılayaram,
hamıdan gec gizlənərəm...
Mən elə bir adamam –
cavab tapsam suala,
Hamıdan tez susaram,
hamıdan gec dillənərəm...
Mən elə bir adamam –
keçmədiyim dərsləri
Hamıdan tez oxuyaram,
hamıdan gec öyrənərəm...
Gəlmişəm
Nəfsimi boğmamış
boğulmuşam mən,
Dərd məni yormamış
yorulmuşam mən.
Fələk doğulmamış
doğulmuşam mən -
Ondan əvvəl saya-saya gəlmişəm...
Yer qatında
işıq saçan adamam,
Mən Günəşə
süfrə açan adamam -
Qışın soyuğundan
qaçan adamam,
Allah-Allah deyib yaya gəlmişəm...
Dünya daralmayıb,
yenə genişdi,
Həmin görkəm,
həmin o görünüşdü -
Çox tanış gəlir,
hə, yadıma düşdü,
Bir dəfə də doqquz aya gəlmişəm...
Olmasın müharibələr
Şəhidlər xiyabanında
havaya yaylım atəşi
açılmasın...
Analar diz döyə-döyə
cansız oğullar gətirən
cənazənin qabağına
dizi üstə yıxılmasın...
Atalar ah çəkə-çəkə
Vətən sağ olsun deyərək
üçrəngli, aylı-ulduzlu
bayraqlara sarılmasın...
Kitablara, heykəllərə,
bulaqlara, şəkillərə
“Filankəs filan tarixdə
filan şəhərin uğrunda
Şəhid olub” yazılmasın...
Olmasın müharibələr:
Göyərçinin qanadları
qırılmasın...
Anam bilmir
Uşaq vaxtı anam mənə
yemək yedizdirəndə
üstümə dağıdardım,
anam əsəbləşərdi...
İndi öz əllərimlə qəm yeyirəm,
yerə-göyə dağıdıram...
Anam bilmir!
Səkkiz martda
əlimdə gül
“Ana” şeiri oxuyardım...
İndi ona oxuduğum şeirləri
mən yazıram...
Anam bilmir!
Evə gec çıxardım, darıxdığından
qucaqlayıb qoxlayardı:
İndi üstümdən siqaret iyi gəlir...
Anam bilmir!
Yalan nəsə deyəndə mən
Allaha and içməyimi istəyərdi...
İndi anamın canına and içirəm...
Anam bilmir!
Elvin İntiqamoğlu
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
