ABŞ administrasiyası Venesuela Prezidenti Nikolas Maduro və onun yaxın ətrafına təzyiqi artırır. ABŞ Maliyyə Nazirliyinin açıqlamasında bildirilir ki, yeni sanksiyalar Maduro administrasiyasını və Venesuelanın neft sektorunda sanksiyalardan yayınan şəxsləri hədəf alır. Bəyanata görə, sanksiyalar siyahısına əlavə edilən əsas şəxslər və qurumlar bunlardır:
Hafta.az yazır ki, Maduronun yaxın ətrafı: Maduronun həyat yoldaşı Cilia Floresin üç qardaşı oğlu və Maduro ilə əlaqəli bir iş adamı.
Gəmiçilik şirkətləri: Venesuelanın neft sektorunda fəaliyyət göstərən altı gəmiçilik şirkəti və altı gəmi.
Sanksiya tətbiq edilən gəmilərin "aldadıcı və təhlükəli gəmiçilik təcrübələri" ilə məşğul olduqları və "narkoterrorçu rejimi"nə maliyyə resursları təmin etməyə davam etdikləri iddia olunur.
Maliyyə Nazirliyi həmçinin sanksiya tətbiq edilən şəxslərin keçmiş hüquqi proseslərini xatırladıb:
Kokain işi: Floresin iki qardaşı oğlu 2015-ci ildə Haitidə yüzlərlə kiloqram kokain ABŞ-a daşımağa cəhd etdiklərinə görə saxlanılıb və 2016-cı ildə narkotik qaçaqmalçılığında ittiham olunublar. Lakin bu şəxslər 2022-ci ildə ABŞ-ın keçmiş prezidenti Co Bayden tərəfindən əfv edilib.
Üçüncü qardaşı oğlu: Bildirilib ki, sanksiya tətbiq edilən üçüncü qardaşı oğlu Venesuelanın milli xəzinədarı və dövlət neft şirkəti PDVSA-nın vitse-prezidenti vəzifəsində çalışır və əvvəllər 2017-ci ildə sanksiyalara məruz qalıb, lakin 2022-ci ildə siyahıdan çıxarılıb.
Yeni sanksiyalarla ABŞ Maduronun neft gəlirlərini məhdudlaşdırmaq səylərini davam etdirir.
