Vadeful bildirib ki, Moskvanın mövqeyi “ciddi sayılmayacaq” bir şərt üzərində qurulub...
Poliqon xəbər verir ki, Almaniyanın xarici işlər naziri Yohann Vadeful Rusiyanın Ukrayna üzrə mümkün sülh danışıqlarına real hazırlıq nümayiş etdirmədiyini bildirib. Vadeful bu fikri Münhen Təhlükəsizlik Konfransının tədbiri çərçivəsində Berlin Mündəricat Forumunda çıxışı zamanı səsləndirib.
Nazirin sözlərinə görə, Moskvanın hazırkı siyasi mövqeyi konstruktiv danışıqlar üçün heç bir əsas yaratmır.
“Biz hələlik Rusiyanın danışıqlara real hazırlığını görmürük. Bu gün Rusiyanın mövqeyi sanki belədir: əgər 11 il davam edən hərbi əməliyyatlarla əldə edə bilmədiyimizi pulsuz əldə etməyəcəyiksə, onda danışmağa dəyməz. Bu, ciddi qəbul ediləcək danışıqlar mövqeyi deyil”, deyə Almaniya XİN rəhbəri qeyd edib.
Vadeful əlavə edib ki, bu yanaşma əslində müharibənin nə zaman bitəcəyinə dair mühüm siqnaldır.
“Bu müharibə yalnız o zaman başa çatacaq ki, Putin onu davam etdirməyin nəticələrinin həddindən artıq ağrılı olduğunu hiss etsin”, deyə nazir vurğulayıb.
Almaniya XİN rəhbəri həmçinin Rusiyanın tez-tez Qərbi “Rusiya cəmiyyətinə təsir etmək üçün gizli planlarda” günahlandırdığını xatırladıb. O deyib ki, Kremlin ritorikasını düzgün anlamağın yolu onun kimləri nədə ittiham etməsinə baxmaqdan keçir.
“Əgər Rusiyanın davranışını anlamaq istəyirsinizsə, başqalarını nədə günahlandırdığına qulaq asın. Biz hamımız Rusiyanın guya Qərbin gizli təsir planlarından şikayətlərinə öyrəşmişik. Əslində isə demokratik prosesləri dünyanın müxtəlif bölgələrində sarsıtmaq üçün milyonlarla dollar xərcləyən məhz Rusiyadır”, deyə Vadeful bildirib.
Vadefulun çıxışı Almaniyanın Ukraynaya dəstəyinin davam edəcəyi və Moskvanın mövqeyinə qarşı sərt siyasi kursun qorunacağı barədə açıq mesaj kimi qiymətləndirilir.
Poliqon.info
