Dövlət Turizm Agentliyinin təşkilatçılığı ilə dekabrın 2–3-də media nümayəndələrinin Şəkiyə infoturu baş tutub. Səfərin əsas məqsədi bölgənin sənətkarlıq ənənələrini, tarixi irsini və daxili turizm imkanlarını daha geniş şəkildə tanıtmaq olub. Jurnalistlərə təqdim edilən proqram həm ənənəvi sənət sahələrinin bu gün də yaşadıldığını, həm də Şəkinin tarixi məkanlarında aparılan bərpa işlərinin turizm inkişafına yeni nəfəs verdiyini göstərib.
Infoturun mühüm dayanacaqlarından biri “Yuxarı Baş” Milli Tarix-Memarlıq Qoruğu oldu. Jurnalistlərə burada qorunan tarixi abidələr, maddi-mədəniyyət nümunələri və Şəkinin simvolu sayılan Xan sarayı haqqında ətraflı məlumat verildi. Bildirildi ki, Dövlət Turizm Agentliyinin tabeliyində olan qoruqlarda, o cümlədən “Yuxarı Baş”da mədəni irsin qorunması ilə yanaşı, ərazinin turistlər üçün daha cəlbedici məkana çevrilməsi məqsədilə geniş bərpa və yenidənqurma işləri həyata keçirilir. Hazırda Dairəvi Məbəddə aparılan bərpa işləri bunun bariz nümunəsidir.
Şəkiyə gələn hər bir turistin ilk görmək istədiyi məkan Xan sarayıdır. XVIII əsrin şah əsərlərindən sayılan bu bina yalnız memarlıq baxımından deyil, həm də milli sənətkarlığın zamanla necə yüksək səviyyədə formalaşdığını nümayiş etdirir. Divar rəsmləri, şəbəkə sənətinin nadir nümunələri, sarayın heç bir mismardan istifadə olunmadan inşa edilməsi onu Şərq memarlığının unikal incilərindən birinə çevirir.
Jurnalistlərə sarayın tikilmə tarixi, bədii üslubu və qorunma işləri barədə məlumat verildi. Ekskursiya iştirakçıları sarayın hər detalında əsrlərin nəfəsini duyduqlarını, bu məkanda aparılan bərpa işlərinin həm orijinallığı qoruduğunu, həm də turistlər üçün daha rahat şərait yaratdığını vurğuladılar. Xan sarayı Şəkiyə gələn qonaqlar üçün artıq yalnız bir muzey deyil, həm də şəhərin turizm brendinə çevrilmiş mədəni simvoldur.
İki günlük səfər bir daha göstərdi ki, Şəki təkcə memarlıq inciləri ilə deyil, həm də sənətkarlığın yaşadıldığı canlı irs məkanı ilə Azərbaycan turizmində xüsusi yer tutur. Bərpa olunan tarix, yaşadılan sənət ənənəsi və yaradılan yeni turizm infrastrukturu sayəsində Şəki ölkənin ən cəlbedici turizm istiqamətlərindən biri olmağa davam edir.
