Dövlət Təhlükəsizliyi Xidmətinin son əməliyyat-axtarış tədbirləri bir daha göstərdi ki, ölkəmizdə stabilliyin qorunması möhkəm əllərdədir və “beşinci kolon” adlandırılan xəyanət şəbəkəsinin gizli əməlləri cəzasız qalmayacaq. Bunu deputat Vüqar Bayramov bildirib.
Millət vəkili əlavə edib ki, xaricdən gələn tapşırıqları icra edən Ramiz Mehdiyev və onun əlaltıları olan Əli Kərimli və dəstəsi artıq ifşa olunur, istintaq qarşısında cavab verirlər: “Onlara nə “akademik”, “demokrat”, “islahatçı” kimi saxta titullar, nə də uzun müddət xidmət etdikləri dövlət və ya dövlətlər yardımçı ola biləcəklər.
Tamamilə aydındır ki, 2013-cü ildə prezident seçkiləri ərəfəsində Rusiyadakı mərkəzlərdən idarə olunan və yaradılan anti-milli “şuralar”ın məqsədi Azərbaycanı yenidən anarxiyaya sürükləmək və Ramiz Mehdiyevin 2003-cü ildə yarımçıq qalmış xüsusi planını reallaşdırmaq idi”.
Vüqar Bayramov daha sonra bildirib: “Güclü Azərbaycan hakimiyyəti və möhkəm xalq-iqtidar birliyi məhz həmin məkrli planların reallaşmasına imkan vermədi və anti-milli qüvvələr əmin olunslar ki, gələcəkdə də istənilən belə addımların qarşısı qətiyyətlə alınacaq.
Ərazi bütövlüyü və suverenliyini tam bərpa etmiş Azərbaycan daha güclüdür və ölkəmizdə ictimai-siyasi stabilliyə nəzarət möhkəm əllərdədir. Əlaltılar unudurlar ki, Azərbaycan AXC-Müsavat qrupunun səriştəsiz idarəetməsi nəticəsində tənəzzülə uğrayan ötən əsrin 90-cı illərinin əvvəllərindəki ölkə deyil.
Azərbaycan rəhbərliyi istər daxili, istərsə də xarici anti-Azərbaycan qüvvələrin bu cür məkrli niyyətlərinin qarşısını almağa qadirdir və hər zaman da alacaq”.
V.Bayramov qeyd edib ki, bu gün ölkəmizdəki xalq-iqtidar birliyini, inkişafı, sabitliyi heç bir qüvvə poza, müstəqilliyimizi sarsıda bilməz: “Vətənə xəyanətin isə heç zaman bəraət yeri yoxdur”.
ZÜMRÜD
