BAKI, 28 noyabr. TELEQRAF
İngiltərənin “Çelsi” klubunun ukraynalı futbolçusu Mixaylo Mudrikin dopinq qalmaqalı ilə bağlı yalan dedektorundan keçib.
Teleqraf “Daily Mail” nəşrinə istinadən xəbər verir ki, oyunlardan müvəqqəti kənarlaşdırılan 24 yaşlı vingerin testinin nəticələri onun günahsız olduğunu təsdiqləyib.
Mudrikin orqanizmində dopinq izləri aşkarlanması ilə bağlı ilk məlumat ötən ilin dekabr ayının ortalarında yayılmışdı. B nümunəsinin analizi ya aparılmayıb, ya da ictimaiyyətə açıqlanmayıb.
Qayda pozuntusu təsdiqlənəcəyi halda, Mudriki dörd ilədək diskvalifikasiya gözləyə bilər.
Qeyd edək ki, Mixaylo 2023-cü ildə "Şaxtyor Donetsk" klubundan "Çelsi"yə keçib. O, London təmsilçisində 73 oyunda 10 qol vurub. Müqaviləsi 2031-ci ilə qədər nəzərdə tutulub.
