“İlk etapda siyahıya ürək-damar xəstəliklərinin müalicəsində istifadə olunan, qan təzyiqini salan dərmanlar daxil edilib. Bu dərmanların dəyərinin tam şəkildə və ya müəyyən hissəsinin Sığorta Fondu tərəfindən qarşılanması nəzərdə tutulur”.
NOCOMMENT.az metbuat.az-a istinadən xəbər verir ki, bunu İcbari Tibbi Sığorta üzrə Dövlət Agentliyinin Marketinq və İctimaiyyətlə əlaqələr departamentinin rəhbəri Aynurə Əhmədova bildirib.
Onun sözlərinə görə, dərmanların siyahıya daxil edilməsi üçün tələb olunan meyarlar artıq təsdiqlənib:
“Bunun üçün dərman dövlət reyestrində qeydiyyatda olmalıdır, keyfiyyət, təhlükəsizlik və effektivlik tələblərinə cavab verməlidir, qiyməti dövlət tərəfindən tənzimlənməlidir və ən önəmlisi Sığorta Fondunun maliyyə imkanlarına uyğun olmalıdır.
Qeyd edək ki, elektron reseptlərin İcbari Tibbi Sığorta üzrə Dövlət Agentliyinin məlumat bazası ilə inteqrasiyası üzrə texniki işlər artıq aparılır.
Sığorta hesabına qarşılanan dərmanlar yalnız Agentliklə müqavilə bağlayan özəl apteklərdən veriləcək. Bu apteklər xüsusi loqo ilə işarələnəcək ki, vətəndaşlar onları asanlıqla tanıya bilsinlər”.
