Qlobal informasiya risklərinin sürətlə artdığı və dezinformasiya kampaniyalarının geniş yayıldığı bir dövrdə Türk dövlətlərinin media ekosistemində dayanıqlılığını gücləndirməsi strateji zərurətə çevrilib. Bu səbəbdən Türk dövlətlərinin media və kommunikasiya sahəsində əməkdaşlığını möhkəmləndirmək məqsədilə təşkil olunan bu Media Forumu mühüm əhəmiyyət kəsb edir.
Herbiand.az xəbər verir ki, bu sözləri jurnalistlərə açıqlamasında Medianın İnkişafı Agentliyinin kommunikasiya şöbəsinin müdiri Səidə Şəfiyeva deyib.
O qeyd edib ki, təşkilata üzv dövlətlərin media və kommunikasiya sahəsinə məsul 30-a yaxın yüksəksəviyyəli rəsmisinin iştirak etdiyi Media Forumunda aktual məsələlər müzakirə olunub.
“Forumda təhlükəsiz informasiya mühitinin formalaşdırılması, rəqəmsal media tendensiyalarının operativ şəkildə mənimsənilməsi, kadr potensialının gücləndirilməsi və media savadlılığının ictimaiyyətdə geniş təşviq edilməsi məsələlərinə toxunuldu. Keçirilən görüşlərdə təşkilata üzv dövlətlərin media qurumları arasında məzmun mübadiləsinin, strateji kommunikasiya sahəsində koordinasiyalı fəaliyyətin gücləndirilməsinin və dezinformasiyaya qarşı çevik müdafiə mexanizmlərinin formalaşdırılmasının Türk dünyası üçün nə dərəcədə prioritet məsələ olduğu vurğulandı. Bu istiqamətlər üzrə yeni təşəbbüslərin və yeni layihələrin icrası nəzərdə tutulur”, - deyə S.Şəfiyevə əlavə edib.
