Rusiyada genişmiqyaslı mobilizasiya elan edildikdən sonra minlərlə hərbçi, müqaviləli xidmətçilər və çağırışçılar ölkədən qaçmaq qərarı verib. Onlardan biri də adının gizli saxlanılması üçün “Valentin Mixaylyuk” kimi təqdim edilən gəncdir.
Musavat.com xarici agentliklərə istinadən xəbər verir ki, O, 2021-ci ildə iki illik müqavilə imzalayıb, lakin Ukrayna müharibəsi başlayandan sonra ordudan ayrılmağa çalışıb, alınmayınca fərarilik edərək Ermənistana sığınıb. Onun hekayəsi rusiyalı fərarilərin bölgədəki real vəziyyətini və gündəlik qorxu şəraitindəki həyatını açıq şəkildə göstərir.
Valentin danışır ki, Rusiyada hərbi hissəni icazəsiz tərk etdikdən sonra onun həbs olunması üçün ən çox üç gün vaxt olur. O isə artıq ölkədən çıxdığı günün səhərindən etibarən axtarışa verilib. “Dördüncü gün artıq barəmdə cinayət işi açıldı. Bunu yalnız «Gosuslugi» üzərindən məhkumluq arayışı alanda öyrəndim”, – deyə o bildirir.
Keçmiş xidmət yoldaşları ona çatdırıblar ki, komandirlər “onu tapmaq üçün hər şeyi etməyə hazırdırlar”. Valentin isə özündən çox Rusiyada qalan valideynləri üçün narahatdır. Onun sözlərinə görə, bu həm şəxsi təhlükəsizlik, həm də psixoloji təzyiq mexanizmidir.
Ermənistana qaçdıqdan sonra belə, o, özünü tam təhlükəsiz hiss etmir. Son illərdə ölkədə bir neçə rus fərarisinin saxlanılması onun narahatlığını daha da artırıb. “Artıq dördüncü mənzildə yaşayıram. Daim yer dəyişirəm. Çalışıram ki, sosial şəbəkələrdə heç nə paylaşmayım, şəkil yükləməyim, öz yerimi heç kim bilməsin”, – deyə o danışır.
Valentin etiraf edir ki, orduda keçirdiyi illər onun psixoloji vəziyyətinə ciddi təsir göstərib. “Ordu məni daha da narahat, daha da gərgin etdi. İndi isə bilirəm ki, məni axtarırlar. Beyin avtomatik olaraq təhlükə axtarır”, – deyə o bildirir. Bu səbəbdən o, gecə-gündüz ayıqdır, telefon və sənədlərlə bağlı iz qoymamağa çalışır və hər ehtimala qarşı qapıları iki dəfə yoxlayır.
Rusiyalı fərarilərin Ermənistanda saxlanılması son illərdə mütəmadi hal alıb. 2023-cü ildə Dmitri Setrakov, 2024-cü ildə isə Anatoli Şçetinin saxlanılmışdı. Sonuncu daha sonra Rusiyaya qaytarılmışdı. 2025-ci ilin yayında Semyon Subbotin də Ermənistan polisi tərəfindən tutulub, lakin ekstradisiya edilməyib. Bu hadisələr rus fərariləri arasında qorxunu daha da artırıb.
Valentinin hekayəsi təkcə fərdi dram deyil — bu, Rusiya ordusundan qaçan yüzlərlə gəncin necə yaşadığının ümumi mənzərəsini göstərir.
Musavat.com
