Noyabrın 22-də Braziliyanın keçmiş prezidenti Jair Bolsonaru elektron qolbağı çıxarmağa cəhd etdiyi üçün saxlanılıb.
"Unikal" xəbər verir ki, o bu cəhdini halüsinasiyalar və paranoya ilə əlaqələndirib.
Bolsonaru Ali Federal Məhkəmədə keçirilən dinləmədə elektron ayaq biləyi monitorunda dinləmə cihazının olması ilə bağlı "halüsinasiya" və "müəyyən bir paranoya"nın onu cihazı sındırmağa cəhd etməyə sövq etdiyini" bildirib.
Keçmiş prezident hərəkətlərini dərman qəbulu ilə əlaqələndirib, lakin qaçmaq niyyətində olmadığını bildirib. Bolsonaru əlavə edib ki, ona yaxın heç kim ona kömək etməyib və qızı, qardaşı və məsləhətçisi həmin vaxt yatıb.
Xatırladaq ki, Braziliya Ali Məhkəməsi keçmiş prezident Jair Bolsonarunu Lula da Silvaya qarşı hərbi sui-qəsd təşkil etməkdə günahkar bilib.
Bolsonaru, Lula da Silvanın 2023-cü ilin yanvar ayında hakimiyyətə gəlməsinin qarşısını almaq üçün sui-qəsd işində təqsirləndirilən şəxslərdən biridir. Keçmiş Braziliya lideri hər hansı bir qanun pozuntusunu rədd edir və özünü siyasi təqib qurbanı adlandırır.
12 sentyabrda Bolsonaru çevriliş cəhdinə görə 27 il üç ay müddətinə azadlıqdan məhrum edilib. Bolsonarudan əlavə, onun yeddi əməkdaşı, o cümlədən Braziliyanın yüksək vəzifəli nazirləri və rəsmiləri də işdə təqsirli biliniblər. Onlar zorakı hərəkətlər yolu ilə demokratik qanunun aliliyini pozmaqda ittiham olunurlar.
