“Çətin səfər idi, yaxşı formada olan bir komandaya qarşı oynayırdıq. Bilirdik ki, “Sabah”ın son matçlarda qələbə seriyası var. Biz də oyuna ciddi hazırlaşmışdıq. Futbolçularımın nümayiş etdirdiyi performans bizi sevindirdi. Təəssüf ki, qol epizodlarını dəyərləndirə bilmirik. Çempionatın əvvəlindən bəri yüz faizlik fürsətləri qaçırırıq, bunun üzərində işləyirik. Oyun planımızın əsas məqamları alındı və vacib xal əldə etdik. İndi isə gələcək matçlara fokuslanacağıq”.
Msport.az xəbər verir ki, bu sözləri “Şamaxı”nın baş məşqçisi Ayxan Abbasov Azərbaycan Premyer Liqasının 12-ci turunda “Sabah”la keçirilən oyundan sonra səsləndirib.
– Mübahisəli epizodlara baxdınızmı?
– Açığı, təkrar görüntülərə baxmadım. Oyunun tempi yüksək idi və baş hakim də mübarizəyə müəyyən qədər imkan verirdi. Mərkəzdə 1-2 xırda epizod oldu, bu da futbolda normaldır. Meydanda hər şeyə reaksiya veririk, amma düşünürəm ki, VAR həmin vəziyyətləri incələyib. Özüm baxmadığım üçün konkret fikir bildirə bilmərəm.
– Rüfət Abbasov bu gün vinger mövqeyində oynadı. Deyəsən, yeni Toral Bayramov yetişdirirsiniz?
– Bu gün seçdiyimiz sistem tam olaraq rəqibə hesablanmışdı. “Sabah”ın güclü hücum xətti var, buna görə də oyuna uyğun dəyişiklik etmişdik. Rüfətin özünə inamının artması üçün onu hücumda oynatdıq. İlk hissədə yaxşı performans göstərdi, sonradan yoruldu. Rüfət universal futbolçudur, gələcəkdə sağ cinahda da istifadə edə bilərik.
– Demək olar ki, “Sabah”ı daha yaxşı tanıyırsınız…
– Bu mövsüm onlara uduzmuşduq. Ötən mövsümdə də oyunlarımız maraqlı keçmişdi. Üstəlik, “Sabah”ın baş məşqçisi indi fərqlidir. Ola bilsin ki, bu dəfə bizim belə bir sistemi seçəcəyimizi gözləmirdilər. Çempionatda bütün komandalar bir-birini yaxşı tanıyır və biz də hansısa məqamda rəqibi təəccübləndirmək istədik. Alınmaya da bilərdi, amma risk etməlisən. Ən çox sevindiyim məqam odur ki, futbolçular dəyişiklikləri tez qavrayırlar. “Sabah” yaxşı komandadır, bu mövsüm daha rəngarəng və dinamik futbol oynayırlar.
– Legioner limitinin ləğvindən sonra futbolun keyfiyyətinin artacağı deyilirdi. Amma meydanda bu görünmür. Ötən mövsümlə müqayisədə keyfiyyət artıb?
– Bizim liqa çətindir, bunu kənardan olan mütəxəssislər də vurğulayır. Bəzən oyunun yaxşı görünməməsinin səbəbi oyun saatı və stadiondakı boş tribunalar ola bilər. Biz bir çox xarici liqalara baxırıq. Məsələn, Xorvatiya və Serbiya çempionatlarında bəzən oyunda heç iki korner belə olmur. Əvvəllər daha çox hücum futbolu oynanılırdı, indi taktiki mübarizə ön plana çıxıb. Komandaları başa düşmək olar, nəticəyə fokuslanırlar. Limitin ləğvindən sonra səviyyənin sürətlə yüksələcəyi fikri ilə razılaşmıram.
– Hazırkı temp çempionata baxanda gələcəkdə milli komandaya ümid verirmi?
– Tempin necə göründüyünü bilmirəm. Bu oyunun göstəricilərini də dəqiq bilmirəm. Oyunun təmiz gedişatına baxmaq lazımdır. Premyer Liqamız bir çox ölkələrin çempionatlarından üstün səviyyədədir. Bizdə oyunların ən aşağı tempi 35-37 dəqiqə olur, amma bəzi ölkələrdə bu göstərici 30 dəqiqəyə düşür. Məsələn, “Qarabağ”la oyunumuzda təmiz 60 dəqiqə yüksək səviyyədə futbol oynandı. Bu, çox yaxşı göstəricidir, amma tempimizi daha da artırmalıyıq. Çempionatın tempi artanda avtomatik milli də yaxşı olacaq demək düzgün deyil. Komandada sağlam rəqabət olmalıdır. Məsələn, Xəyal Əliyev “Sabah”da əsas heyət üzvüdür. Biz rəqabəti də artırmalıyıq.
