Filmdə çalışan tədqiqatçılar Hitlerin DNT-sində Kallman sindromu ilə əlaqəli mutasiya aşkar etdiklərini iddia edirlər. Bu xəstəlik gecikmiş cinsi inkişaf və ciddi hormonal problemlərlə yanaşı, bəzi hallarda mikropenis kimi nəticələrə gətirib çıxara bilər.
Araşdırma qrupu Hitlerə aid olduğu iddia edilən qan izlərini, həmçinin diktatorun qohumlarından götürülən Y-xromosom məlumatlarını müqayisə edib. Bundan başqa, 1920-ci illərə aid tibbi sənədlərdə ona kriptorkizm diaqnozunun qoyulduğu qeyd olunur.
Filmin müəllifləri həmçinin bildiriblər ki, Hitlerin DNT-sində yəhudi mənşəyinə dair heç bir marker aşkarlanmayıb. Bunun əvəzində autizm, şizofreniya və bipolyar pozuntuya meylliliklə bağlı əlamətlərin ola biləcəyi irəli sürülür.
Müstəqil ekspertlər bu nəticələrin hələ rəy prosesindən keçmədiyini, istifadə olunan nümunələrin mənşəyinin tam təsdiqlənmədiyini və iddiaların elmi baxımdan sual altında olduğunu bildiriblər.
Senzasiyalı sənədli filmin premyerası 15 noyabrda Channel 4 telekanalında olacaq.
