Kreml uzun illər Vladimir Putinin həqiqi mövqeyini gizlətmək üçün xüsusi hazırlanmış “ikili kabinetlər”dən istifadə edib. Araşdırmaçı jurnalistlər “Sistema” layihəsinin təhqiqatında müəyyən ediblər ki, rus lider üçün ən azı üç eyni kabinet fərqli rezidensiyalarda – Novo-Oqarevo, Soçi və Valdayda yaradılıb.
Jurnalistlərin əsas sübutları arasında qapı tutacağı, divardakı dekorativ xətt və sənəd qovluğu yer alıb. Araşdırmaçılar “Moskva.Kreml.Putinin” proqramının onlarla saatlıq efirini, Kremlin arxiv sənədlərini, dövlət satınalmaları üzrə planları və binaların planlarını analiz ediblər. Məlum olub ki, 2015-ci ildən etibarən Putinin Moskvaya yaxın kabinetinin dəqiq nüsxələri hazırlanıb ki, onun harada olduğunu gizlətmək mümkün olsun.
Kabinetlər vizual olaraq eyni olsa da, jurnalistlər detallarda fərqlər aşkar ediblər:
Soçi kabineti – qapı tutacağı, ventilyasiya və divardakı şpərin yerləşməsi fərqlidir.
Valday kabineti – termostat və masa rəngi digər kabinetlərdən fərqlənir.
Novo-Oqarevo kabineti – 2015-ci ildən qalan orijinal kabinetdir.
Jurnalistlər qeyd edirlər ki, Putin bir gün ərzində bir kabinetdə görünə, sonra eyni kabinetin başqa “təmirli” versiyasında və nəhayət, yenidən əvvəlki kabinetdə ola bilər. Valday kabinetində isə Putin 130 rəsmi tədbir keçirib, əsasən videokonfrans vasitəsilə.
2023-cü ilin fevralından Putinin Soçi kabinetindən istifadəsi dayandırılıb – Ukrayna dronları hücumu təhlükəsi səbəbindən. 2025-ci ilin əvvəlindən isə Novo-Oqarevo kabineti də istifadədən çıxarılıb. Yalnız 2025-ci ilin payızında o, bəzən yenidən rezidensiyalarına qayıtmağa başlayıb.
Qeyd edək ki, 9 sentyabrda jurnalistlər Putinin Soçidə ola biləcəyini qeyd etmişdilər; daha sonra Kreml hücum zamanı onun həqiqətən də həmin ərazidə olduğunu təsdiqləyib.
