Azərbaycandan qayıdan Türkiyəyə məxsus "C-130" hərbi yük təyyarəsi Gürcüstan ərazisində qəzaya uğrayıb. Gürcüstan Hava Naviqasiya Xidməti hərbi təyyarənin həyəcan siqnalı vermədən radarlardan itdiyini açıqlayıb. "C-130" ABŞ tərəfindən dizayn olunaraq istehsal edilən dörd turbovintli mühərrikə malik hərbi nəqliyyat təyyarəsidir. Hazırlıqsız və ya yarımhazır uçuş-enmə zolaqlarından eniş və qalxış üçün nəzərdə tutulmuş təyyarə hərbi yük, qoşun və təxliyə daşımaq qabiliyyətinə malikdir.
1954-cü ildən bəri 2 500-dən çox təyyarə istehsal olunub, ABŞ, Kanada və Avstraliya da daxil olmaqla 60-dan çox ölkə tərəfindən fəal şəkildə istifadə olunur.
Türkiyə Hərbi Hava Qüvvələri 74 tam təchiz olunmuş əsgər daşıya bilən təyyarəni 1963-cü ildən bəri istifadə edir.
"C-130" çoxməqsədli helikopterlərdən və 6 təkərli zirehli maşınlardan tutmuş standart paletli yüklərə və hərbi personala qədər geniş çeşiddə böyükölçülü yük daşıya bilir.
Bundan əlavə, "C-130" izlənilən avadanlıqlar, yerdən yüklənmiş təchizatlar, hava platformaları, konteyner çatdırılma sistemi paketləri, nəqliyyat vasitələri, personal və ya aerotibbi təxliyələr daxil olmaqla müxtəlif yük növləri üçün tez bir zamanda yenidən konfiqurasiya edilə bilər.
Qeyd edək ki, müxtəlif mənbələrə görə, "C-130" təyyarələri 400-dən çox qəzaya səbəb olub və nəticədə, ümumilikdə 3 466 nəfər həlak olub. Bu isə son 40 ildə hər 250 min uçuş saatında bir təyyarə qəzasının qeydə alınması deməkdir. "C-130"un qəza tarixçəsinə nəzər saldıqda mühərrik nasazlıqları, pis hava şəraiti, həddindən artıq yüklənmə və müharibə mühiti kimi amillər səbəb kimi qeyd olunur.
Daha ətraflı Baku TV-nin videomaterialında:
Hərbi
