Sibihanın paylaşdığı mesajda deyilir: "Gürcü tərəfi güzgüdəki əksinə görə inciməməlidir. Gürcüstanın Aİ-yə üzvlük prosesindəki aşağı nəticələrinin bütün səbəbləri Kiyevdə deyil, Tiflisdədir. Ukraynaya gəlincə, biz dost Gürcü xalqına yalnız bir şey arzu edirik: mövcud hökumətlərinin siyasətinə baxmayaraq, öz Avropa istəklərini reallaşdırsınlar. Gürcüstan Avropadır, "Rus dünyası" deyil."
Ukraynanın XİN başçısı sosial şəbəkədə Gürcüstan XİN rəhbəri Maka Boçorişvilinin jurnalistlərə verdiyi bəyanata istinad edən "Liganet" portalının "Gürcüstan Ukraynanı onun Avropa İttifaqına üzvlüyünə mane olmaqda ittiham edir" başlıqlı məqaləsini paylaşıb.
Gürcüstan Xarici İşlər naziri Maka Boçorişvili isə belə bir iddia ilə çıxış edib: "Gürcüstanın Avropa İttifaqına inteqrasiya və namizəd statusu almaq prosesi müəyyən mənada Ukraynanın mənfi münasibəti ilə müşayiət olunurdu - Gürcüstan bu statusu almasın deyə. Biz 2022-2023-cü illərdə hansı kampaniyaların aparıldığını öz gözlərimizlə gördük... Ukrayna müxtəlif formalarda Gürcüstanın Avrointeqrasiyasına qarşı çıxış edib. Bu, açıq şəkildə baş verirdi və biz hamımız bunu bilirik," - deyə Boçorişvili bildirib.
