Donald Tramp administrasiyası Ədliyyə Nazirliyindən Venesuelada quru hədəflərinə zərbələri əsaslandırmaq üçün ayrıca hüquqi rəy istəyir.
Musavat.com xəbər verir ki, məlumatı CNN telekanalı ABŞ rəsmisinə istinadən yayıb. Bildirilir ki, məqsəd əməliyyatların Konqresin hərbi güc tətbiq etmək üçün icazəsini tələb etmədən həyata keçirilməsinə nail olmaqdır.
Noyabrın 6-da keçirilən qapalı brifinqdə Dövlət katibi Marko Rubio və Pentaqon rəhbəri Pit Heqset də daxil olmaqla administrasiya rəsmiləri qanunvericilərə bildiriblər ki, ABŞ-ın hazırda Venesuelada quru hədəflərinə hücumlar üçün nə planı, nə də hüquqi əsası var. Onlar izah ediblər ki, mövcud hüquqi rəy yalnız narkotik qaçaqmalçılığında şübhəli bilinən gəmilərə zərbələr endirməyə icazə verir, quru hədəflərinə deyil.
Bir ABŞ rəsmisi xəbərdarlıq edib ki, Tramp hələ Venesuela ilə bağlı hansı addımı atacağına qərar verməyib. Brifinqdə həmçinin Karib dənizində hərbi iştirakın kəskin artırılmasının quru zərbələri üçün deyil, narkotik əleyhinə əməliyyatları dəstəkləmək üçün nəzərdə tutulduğu vurğulanıb.
CNN-in məlumatına görə, brifinq bəzi demokratları ABŞ-ın hərəkətlərinin qanuniliyinə inandıra bilməyib. Nümayəndə Qreqori Miks bildirib ki, onu bu zərbələrin qanuniliyinə inandıran "heç nə" eşitməyib.
Musavat.com
