Türkiyə qəhrəman Azərbaycan Ordusunun Qarabağda qazandığı qələbənin beşinci ildönümünü qürurla qeyd edir.
“Anadolu” Agentliyinin məlumatına görə, Türkiyənin milli müdafiə naziri Yaşar Gülər bu açıqlamanı verib.
Yaşar Gülər bildirib: "Türkiyə və Azərbaycanın silahlı qüvvələri artıq sadəcə dost deyil, taleyin telləri ilə bağlı iki ordudur. Biz yaxşı bilirik ki, Türkiyənin gücü Azərbaycanın gücü, Azərbaycanın gücü isə Türkiyənin gücüdür."
Milli müdafiə naziri Yaşar Gülər, Baş Qərargah rəisi general-polkovnik Səlcuq Bayraktaroğlu və Azərbaycanın Ankaradakı səfiri Rəşad Məmmədov “8 noyabr Qələbə Günü” və “9 noyabr Dövlət Bayrağı Günü” münasibətilə Ankaradakı Azərbaycan səfirliyi tərəfindən “Qazi” Hərbi Klubunda təşkil edilən qəbulda iştirak ediblər.
Yaşar Gülər qeyd edib ki, Türkiyə xalqı Böyük Vətən Müharibəsinin hər anında dua və dəstək ilə Azərbaycanlı qardaşlarının yanında olub.
“O günlərdə biz həmişə dediyimiz həqiqəti bir daha tam aydınlıqla anladıq: “İki dövlət, bir xalq”. Azərbaycanın sevinci bizim sevincimiz, ağrısı bizim ağrımızdır. Doğma torpağımızda kök salmış böyük palıd ağacının iki budağı kimi, bayrağımız və müqəddəs dəyərlərimiz uğrunda hər cür fədakarlığa hazırıq. Ən əsası vətənimizin təhlükəsiz və firavan olmasıdır. Ən əsası isə aypara və üç rəngli bayraqlarımızın səmamızda sərbəst dalğalanmasıdır.”
Yaşar Gülər qeyd edib ki, Azərbaycan və Ermənistan arasında daimi sülhün bərqərar olması üçün atılan addımlar Qafqazda təhlükəsizlik və sabitliyin təmin edilməsi üçün mühüm imkanlar yaradır.
“Biz Azərbaycan və Ermənistan arasında davamlı sülhün bərqərar olması üçün atılan son addımları alqışlayırıq və bunu Qafqaz bölgəsində təhlükəsizliyin, sabitliyin və rifahın təşviqi üçün vacib bir fürsət hesab edirik. Vurğulamaq istərdim ki, Türkiyə istənilən şəraitdə Azərbaycan qardaşlarımızı dəstəkləməyə davam edəcək və regionda davamlı sülhün və sabitliyin təmin edilməsi üçün hər cür töhfə verməyə hazırdır”, - deyə nazir əlavə edib.
Almaz Həsənli
