"Avropa İttifaqı (Aİ) Türkiyə olmadan kifayət qədər effektiv ola bilməz, Aİ mövcud olmasa, eyni zamanda Türkiyənin regionda kifayət qədər dayağı olmayacaq".
"Operativ Məlumat Mərkəzi-OMM" xəbər verir ki, bu sözləri Türkiyə xarici işlər naziri Hakan Fidan deyib.
“Biz Avropa ölkələri olaraq iqtisadi, siyasi və təhlükəsizliklə bağlı problemləri birgə həll etmək üçün Avropa coğrafiyası çərçivəsində birləşməliyik. Hesab edirik ki, Aİ regional məsuliyyətin ən yaxşı nümunələrindən biri olaraq, xüsusilə yeni konjunkturada Türkiyə olmadan tamamlanmış hesab edilə bilməz. Eyni zamanda, Avropa İttifaqı olmadan Türkiyənin regionda kifayət qədər dayağı olmayacaq. Buna görə də Aİ və Türkiyə mövcud inteqrasiya prosesini mümkün qədər tez və hər hansı bəhanələr olmadan irəlilətməlidir”, – Fidan bildirib.
O vurğulayıb ki, Türkiyə hökuməti bu məsələ ilə bağlı qətiyyətli mövqe nümayiş etdirir.
“Avropa liderlərinin də bu mövqe ilə razılaşması qiymətlidir. Xüsusilə Almaniya kansleri Fridrix Merzin keçən həftə ölkəmizə səfəri zamanı Türkiyənin Aİ-də dəstəklənməsi barədə açıq bəyanatı xüsusilə əhəmiyyətlidir. Bizim fikrimizcə, ən böyük Avropa dövlətlərinin belə açıqlamaları hazırda bu prosesi bloklayan problemlərin həlli üçün vacib başlanğıc nöqtəsi hesab edilə bilər” – nazir əlavə edib.
Fidan xatırladıb ki, son illərdə qəbul edilmiş müxtəlif qərarlar və hadisələr səbəbindən Aİ inteqrasiyası ilə bağlı bir sıra məsələlərdə irəliləyiş əldə etmək mümkün olmayıb.
