Son illərdəki texnoloji sıçrayışlar dövlətlərin informasiya müstəqilliyi və suverenliyinə təsir edən əsas amillərdən birinə çevrilib. Bunu Türkiyənin Azərbaycandakı səfirliyinin mətbuat müşaviri, Xəzər Universitetinin professoru Dr. Alptekin Cihangir İşbilir noyabrın 5-də Bakıda keçirilən XXI əsrdə dövlət suverenliyi və milli konstitusiyalar: qlobal çağırışlar, tendensiyalar və perspektivlər — “2025: Konstitusiya və Suverenlik İli” çərçivəsində beynəlxalq elmi-praktiki konfransda çıxışı zamanı bildirib.
“Uzun müddət diqqətdən kənarda qalan bu mövzu indi süni intellekt və qabaqcıl texnologiyaların inkişafı fonunda dövlətlərin informasiya müstəqilliyinə birbaşa təsir göstərir,” – o vurğulayıb.
O qeyd edib ki, süni intellektdən vizual dezinformasiyaya qədər bu sahədə ən azı beş-altı elmi təqdimat hazırlanıb.
“Böyük dəyişiklik dövründə süni şəkildə yaradılan təsvirlər, manipulyativ məlumatlar və dezinformasiya elementləri dövlət suverenliyinə təsir göstərən əsas faktorlar sırasına daxil olub və bu proses genişlənməkdədir,” – İşbilir bildirib.
Onun sözlərinə görə, artıq “kibervətən” və “kiber-təhlükəsizlik” anlayışları da ictimai diplomatiya və milli təhlükəsizlik çərçivəsində xüsusi yer tutur. Belə bir şəraitdə dövlətlərin ictimai diplomatiya fəaliyyəti daha mürəkkəb və çoxşaxəli hal alıb.
İşbilir xatırladıb ki, Azərbaycan və Türkiyə arasında imzalanan strateji müttəfiqlik bəyannaməsi iki ölkə münasibətlərini yeni səviyyəyə qaldırıb.
“Türkiyə–Azərbaycan Media Platformu üzrə əməkdaşlıq razılaşması da iki ölkənin birgə ictimai diplomatiya modelini formalaşdırıb və informasiya təhlükəsizliyində qarşılıqlı etimadı gücləndirib,” – o əlavə edib.
Dr. Alptekin Cihangir İşbilir çıxışının sonunda tədbir iştirakçılarına təşəkkür edərək, dövlətlərin texnoloji dövrdə informasiya müstəqilliyini qorumaq üçün birgə elmi və strateji əməkdaşlığa ehtiyac olduğunu vurğulayıb.
Gülnar Nazimqızı
