Antalya, 4 noyabr, Gülay Nəzərova, AZƏRTAC
Azərbaycanlı gənclər dünyanın müxtəlif ölkələrində təhsil alır, yaradıcılıqla, elmlə və incəsənətlə məşğul olur, eyni zamanda ölkəmizi ləyaqətlə təmsil edirlər. Məhz belə tədbirlər sayəsində azərbaycanlı gənclər bir araya gələrək təcrübə, ideya və enerji mübadiləsi aparır, yeni dostluqlar və əməkdaşlıqlar qururlar. Belə tədbirlərdə fəal iştirak edən gənclərdən biri də Çexiyanın Plzen Konservatoriyasında təhsil alan skripka ifaçısı Canel Nəcəflidir.
AZƏRTAC-ın müxbiri ilə həmsöhbət olan gənc ifaçı bildirib ki, artıq 5 ildən çoxdur Diasporla İş üzrə Dövlət Komitəsi ilə sıx əməkdaşlıq edir, müxtəlif konsertlərdə və mədəni tədbirlərdə Azərbaycan musiqisini Avropa səhnələrinə daşıyır.
O vurğulayıb ki, dövlətin gənclərə və diaspor nümayəndələrinə göstərdiyi diqqət, onların inkişafı və yaradıcılıq potensialının dəstəklənməsi Avropada yaşayan hər bir azərbaycanlı gənc üçün böyük önəm daşıyır: “Biz Avropada yaşayan azərbaycanlı gənclər kimi hər zaman hiss edirik ki, dövlətimiz bizim yanımızdadır. Bu dəstək bizə güc və inam verir. Gənclər üçün yaradılan bu imkanlar – forumlar, yaradıcılıq proqramları, mədəni layihələr hər birimizin inkişafına, öz sahəmizdə daha da püxtələşməyimizə şərait yaradır".
