Romanın görməli yerlərindən biri olan Konti Qülləsi qismən dağılıb.
Yeniavaz.com xəbər verir ki, bu barədə “Corriere della Sera” məlumat yayıb.
Bildirilib ki, Romanın mərkəzində yerləşən qüllədə hazırda bərpa işləri aparılır. Dörd işçi içəridə olarkən çökmə baş verib. Onlardan biri ağır vəziyyətdə xəstəxanaya yerləşdirilib, ikisi isə yüngül xəsarətlər alıb. Dördüncüsü dağıntılar altında qalıb.
Təxminən iki saat sonra xilasedicilər sıxışan işçini çıxarmağa çalışarkən, daha bir çökmə baş verib. Yanğınsöndürənlərdən biri yüngül xəsarətlər alıb.
Qeyd edək ki, Konti Qülləsinin tikintisi IX əsrdə başlayıb və uzun müddət nüfuzlu Konti ailəsinin ata-baba iqamətgahı kimi xidmət edib. 13-cü əsrdə ailə üzvü olan Papa III İnnokentinin əmri ilə tamamilə yenidən tikilmişdir.
20-ci əsrdə binada Roma meriyasının ofisləri yerləşib. Son illərdə istifadəsiz qalıb və 2026-cı ildə başa çatdırılması planlaşdırılan təmir işləri aparılır.
