46 min tamaşaçı tutumlu arena Neom şəhərində 350 metrlik göydələnin damında yerləşəcək...
Poliqon xəbər verir ki, Səudiyyə Ərəbistanı dünyanın ilk “göydə stadionu”nu tikməyi planlaşdırır. Məlumata görə, arena Neom adlı futuristik şəhərdə, 350 metr hündürlüyündəki göydələnin damında inşa ediləcək və 46 min tamaşaçı tutumuna malik olacaq. Tikintinin 2027-ci ildə başlanacağı, layihənin dəyərinin isə 1 milyard ABŞ dolları olacağı bildirilib.
Bu unikal obyekt 2034-cü il futbol üzrə dünya çempionatının oyunlarını qəbul edəcək 15 arenadan biri olacaq. “Neom” Səudiyyə Ərəbistanının şimal-qərbində yerləşən və “gələcəyin şəhəri” kimi tanınan innovativ megapolis layihəsidir.
Lakin bu nəhəng layihə ətrafında mübahisələr də davam edir. Beynəlxalq təşkilatların və yerli media mənbələrinin məlumatına görə, Neom şəhərinin inşası zamanı son səkkiz ildə 21 mindən çox işçi həlak olub. İnsan hüquqları üzrə qurumlar bu faktı əmək təhlükəsizliyinin ciddi şəkildə pozulması kimi qiymətləndirir.
Ekspertlər qeyd edirlər ki, “stadion səmada” layihəsi Səudiyyə Ərəbistanının idman və turizm sektorlarını yenidən formalaşdırmaq, həmçinin ölkənin “Vision 2030” strateji proqramı çərçivəsində beynəlxalq imicini gücləndirmək məqsədinə xidmət edir.
Poliqon.info
