Pakistanın müdafiə naziri Əfqanıstanda hakimiyyətdə olan Talibanı “məhv etməklə” hədələyib. Nazir Xavaca Asif İstanbulda atəşkəs danışıqlarının “məqbul bir həll yolu” olmadan başa çatdığını və bu ay baş verən ölümcül toqquşmalardan sonra regionda sülhə zərbə vurduğunu bildirib.
“Reuters” agentliyinin verdiyi məlumata görə, danışıqların nəticəsiz başa çatması yaraqlıların Əfqanıstanı sərhəd boyunca ölkənin təhlükəsizlik qüvvələrinə hücumlar üçün baza kimi istifadə etməsi iddiası ilə bağlı olub.
Bundan sonra Xavaca Asif “X” sosial platformasında paylaşım edərək bildirib ki, Pakistanın Taliban rejimini tamamilə məhv etmək və onu yenidən mağaralarına sığınmaq üçün qovmaq məqsədilə tam arsenalının bir hissəsini belə yerləşdirməsinə ehtiyac yoxdur.
Xatırladaq ki, bu ay Əfqanıstan və Pakistan sərhədində Taliban 2021-ci ildə Kabildə hakimiyyəti ələ keçirdikdən bəri ən amansız zorakılıq aktları nəticəsində onlarla insan həlak olub. Tərəflər oktyabrın 19-da Dohada Qətərin vasitəçiliyi ilə atəşkəs barədə razılığa gəliblər. Amma Türkiyə və Qətərin vasitəçiliyi ilə İstanbulda keçirilən danışıqların ikinci raundu nəticəsiz bitib.
ZÜMRÜD
