Milli Məclisin daha bir deputatının sosial şəbəkə paylaşımı qalmaqal yaradıb.
"Cebheinfo.az" Demokrat.az-a istinadən xəbər verir ki, YAP-çı deputat Aydın Hüseynov yazıçı Kəramət Böyükçölün Milli Məclisi tənqid edən fikirlərini bəyənərək, paylaşım edib. Deputatın bu hərəkəti isə birmənalı qarşılanmayıb.
Aydın Hüseynov sayta açıqlamasında məsələyə belə reaksiya verib:
"Telefonum qardaşım oğlunda olub, texniki səhvdir, rəsmi paylaşılan bir şey deyil. Burada gündəm olunası heç nə yoxdur".
Xatırladaq ki, bir neçə gün öncə AXCP sədrinin müavini Fuad Qəhrəmanlı "Facebook" hesabında jurnalist Rahim Hacıyevin AXCP sədri Əli Kərimli haqda yazdığı qısa məqaləni paylaşıb.
Sözügedən məqaləni Yeni Azərbaycan Partiyasının (YAP) üzvü, 55 saylı Siyəzən - Quba - Xızı seçki dairəsindən deputat seçilmiş Müşfiq Məmmədli də bəyənib. Daha sonra o, sosial şəbəkələri köməkçisinin idarə etdiyini bildirib.
"Cebheinfo.az"
