"İqtisadi müstəqillik ölkənin iqtisadi siyasətinin hər hansı xarici təsirlərə məruz qalmadan həyata keçirilməsidir. İqtisadi siyasətin həyata keçirilməsində müstəqil qərarların verilməsi, xarici müdaxilələrə yol verilməməsidir. Azərbaycan iqtisadi müstəqillik sahəsində özünün uğur hekayəsini yazıb",
Ölkə.az xəbər verir ki, bunu Milli Məclisdə keçirilən "Dövlət suverenliyinin iqtisadi əsasları və iqtisadi müstəqillik" mövzusunda elmi-praktik konfransda çıxışı zamanı parlamentin İqtisadi siyasət, sənaye və sahibkarlıq komitəsinin sədri Azər Əmiraslanov deyib.
Komitə sədri bildirib ki, suverenliyin və dövlət müstəqilliyinin reallığa çevrilməsi üçün ulu öndər Heydər Əliyev və Prezident İlham Əliyev tərəfindən mühüm addımlar atılıb.
O bildirib ki, iqtisadi müstəqillik həm də iqtisadi siyasətdə strateji hədəflərin ölkənin milli maraqlarına cavab verən strateji vəzifələrin nəzərə alınmasıdır: "Bir çox ölkələr heç də buna nail ola bilmirlər. Həmin ölkələrdə suverenlik formal xarakter daşıyır".
Komitə sədri ölkənin istisadi müstəqilliyinin təminatının vacibliyini də önə çəkib: “Azərbaycan iqtisadi müstəqillik sahəsində özünün uğur hekayəsini yazıb. Ölkənin milli maraqlarına cavab verən hədəflər nəzərə alınır. Milli iqtisadiyyat milli maraqlara uyğun qurulmalıdır. Azərbaycan məhz bu gün özünün milli iqtisadiyyatını qurub”.
Mürtəza
