Ədalət, Hüquq, Demokratiya (ƏHD) Partiyasının sədri, millət vəkili Qüdrət Həsənquliyev partiyanın mətbuat xidmətinin suallarını cavablandırıb.
Publika.az həçin müsahibəni təqdim edir:
- Qüdrət bəy, Azərbaycan Respublikası Prezidentinin Qazaxıstana səfərinə münasibətinizi öyrənmək istərdik...
- Prezidentin qardaş Qazaxıstana səfəri və imzalanan sənədlər xalqımızın rifahı və türk xalqlarının birliyi üçün böyük əhəmiyyət kəsb edir. İnsanlarımız qardaşlıq bağlarının möhkəmlənməsinə xidmət edən bu cür səfərlərdən daxili rahatlıq tapır, gələcəyə böyük ümidlə baxır, türk xalqlarının birliyinə, xoşbəxt gələciyənə inanırlar. Həyatımızın demək olar ki, bütün sahələrini əhatə edən imzalanmış çoxsaylı sazişlər iki qardaş xalqı daha da yaxınlaşdıracaq, türk dövlətlərinin inteqrasiyasına böyük töhfə verəcək. Azərbaycan türk xalqlarının yaxınlaşmasına xidmət etməkdə xüsusi fəaliyyəti ilə seçilən ölkədir, türk dünyasının mərkəzidir. Böyük tarix yazılır, gələcək nəsillər bu şanlı səhifəni yazanlara həmişə minnətdar olacaq.
