Avropa İttifaqı (Aİ) on ildən artıq davam edən hazırlıqlardan sonra bu gün (11 oktyabr) yeni giriş-çıxış sisteminin (EES) tətbiqinə başlayır.
NOCOMMENT.az-ın xəbərinə görə, bu barədə DW.com nəşri məlumat verib.
Məlumata görə, barmaq izi və üztanıma vasitəsilə həyata keçiriləcək yoxlamaların uzun növbələr yaratmasından ehtiyat edilir.
Yeni sistemlə artıq ziyarətçilərin pasportlarına möhür vurulmayacaq, bunun əvəzinə barmaq izi və üz fotosunun skanı tətbiq olunacaq.
Aeroportlar, limanlar və dəmiryol stansiyalarına yerləşdirilən xüsusi skanerlər vasitəsilə Aİ-yə qısa müddətə gələn ziyarətçilərin giriş-çıxış məlumatları avtomatik olaraq qeyd ediləcək. Bu üsul səlahiyyətlilərə viza müddəti keçən və ya ölkəyə girişinə icazə verilməyən şəxsləri dərhal müəyyən etməyə imkan verəcək. Qısamüddətli ziyarət 180 gün ərzində ən çox 90 gün Şengen bölgəsində qalmağı nəzərdə tutur.
Bu məlumat İslandiya, Lixtenşteyn, Norveç və İsveçrə kimi Şengen üzvlərindən də tələb olunacaq və əksər hallarda üç il müddətində saxlanılacaq.
Aİ-də hesab edirlər ki, bu proses ilk qeydiyyatdan sonra daha qısa zamanda tamamlanacaq. Sistem 2026-cı il aprelin 10-dək altıaylıq keçid dövrü ərzində mərhələli şəkildə tətbiq ediləcək.
Fransa və Almaniya kimi böyük ölkələr hava limanlarında uzun növbələr yaranmaması üçün ilkin mərhələdə yalnız məhdud sayda yoxlama həyata keçirəcəklər. Estoniya və Lüksemburq kimi kiçik ölkələr isə sistemi ilk gündən etibarən tam şəkildə tətbiq edəcəklər. Xorvatiyada biometrik məlumatların toplanması başlanğıcda gündə dörd saat olacaq, dekabrdan etibarən isə 12 saata qədər artacaq. Sloveniya isə bəzi Şengen giriş nöqtələrində sistemi mərhələli olaraq tətbiq edəcək.
Yeni qaydalar vizasız səyahət hüququna malik ölkələrin vətəndaşlarını da təsir altına alacaq ki, buraya Böyük Britaniya, Avstraliya, ABŞ və Cənubi Amerikanın əksər hissəsi də daxildir.
Aİ-yə üzv Türkiyə, Albaniya və Şimali Makedoniya kimi ölkələrdə vətəndaşların gecikmələrlə üzləşməməsi üçün dəyişikliklər barədə əvvəlcədən məlumatlanmaları ilə bağlı xəbərdarlıq edilir.
Oxu.Az
