Azərbaycan Tibb Universiteti ilə Dövlət Gömrük Komitəsi Tibbi Xidmət İdarəsi arasında imzalanmış əməkdaşlıq memorandumu çərçivəsində Universitetin VI kurs interna tələbələri “Daxili xəstəliklər” fənni üzrə praktiki dərslərini Mərkəzi Gömrük Hospitalının klinik bazasında keçirlər.
Dövlət Gömrük Komitəsi Tibbi Xidmət İdarəsinin rəis müavini, tibb üzrə fəlsəfə doktoru, dosent İsmayıl Əfəndiyevin rəhbərliyi ilə aparılan tədris prosesində tələbələrə daxili orqanların müxtəlif patologiyaları zamanı tətbiq olunan laborator və klinik müayinə üsulları, xəstəliklərin yaranma səbəbləri və inkişaf mexanizmləri, eləcə də müasir klinik protokollara əsaslanan müalicə və profilaktika metodları tədris olunur.
Tələbələr Mərkəzi Gömrük Hospitalının Anesteziologiya və Reanimasiya, Kardiologiya və digər şöbələrində stasionar xəstələrin müayinə və müalicə prosesini izləyir, eləcə də ən müasir tibbi avadanlıqlar haqqında ətraflı məlumat əldə edirlər.
Mərkəzi Gömrük Hospitalında yaradılmış müasir elmi və kliniki tədris şəraiti tələbələrə nəzəri biliklərini praktik bacarıqlarla əlaqələndirmək və peşəkar inkişaflarını təmin etmək üçün geniş imkanlar yaradır.
