İcarəyə götürülən avtomobillər bir çox hallarda əlverişli həll sayılır. Lakin avtomobil icarəyə götürərkən bir sıra amilləri nəzərə almaq lazımdır.
Avtosfer.az xəbər verir ki, buna görə də "Slashgear" nəşri icarəyə götürülməsi məsləhət görülməyən beş avtomobil modelini açıqlayıb.
"Chevrolet Spark"
Bu model münasib qiymətə və yaxşı yanacaq qənaətinə malikdir, həmçinin şəhər içi sürüş üçün kompakt ölçülüdür. Lakin məhz bu kompaktlıq onun əsas mənfi cəhətidir.
“Kiçik ölçülü avtomobildən geniş salon gözləmək çətindir, amma "Kia Rio" və "Hyundai Accent" kimi rəqiblərlə müqayisədə "Spark" daha dar hiss olunur. İkiqapılı quruluş da onu daha az rahat edir, xüsusən dostlarla və ya baqajla səyahət edərkən. Baqaj yeri də məhduddur və arxa oturacaqları qatlamaq üçün ön oturacaqları irəli çəkmək lazım gəlir, bu da sürüş zamanı daha az yer qalmasına səbəb olur”, deyə materialda qeyd edilir.
"Mitsubishi Mirage"
Bu model də qənaətcil olsa da, kiçik üçsilindrli mühərriki səbəbindən yüksək sürətlərdə problemlər yaradır.
“Məsələn, "Chevy Spark" mühərriki 98 at gücünə malikdirsə, "Mirage" yalnız 78 at gücü ilə işləyir. Bu 20 at gücü fərqi magistral yollarda aydın hiss olunur. Üstəlik, sürət artdıqca salonun səsi və vibrasiyası da artır. Buna görə "Mirage" şəhər içi üçün uyğun olsa da, uzun məsafələr və magistral yollar üçün əlverişli deyil”, deyə nəşr yazır.
"Nissan Versa"
Bu kompakt sedan bir çox istifadəçi tərəfindən zəif və qeyri-sabit sürətlənməsi ilə tənqid olunur.
“Bu, təəccüblü deyil, çünki "Versa" beş pilləli mexaniki və ya pilləsiz avtomatik transmissiya (CVT) ilə işləyir. CVT transmissiyalı avtomobillər mexaniki ötürmələrə nisbətən daha sabit və çevik sürətlənmə təmin edir. Lakin bazada yalnız CVT ilə təchiz edilən modellər də var, məsələn, "Toyota Corolla". Buna görə də "Versa"nın hansı ötürmə ilə təchiz olunduğunu araşdırmaq yerinə, icarəyə "Corolla" götürmək daha məntiqli seçim ola bilər”, deyə ekspertlər məsləhət görürlər.
"Jeep Compass"
Bu modelin kompakt ölçüsü, idarə rahatlığı və yolsuzluq qabiliyyəti onu çoxfunksiyalı seçimə çevirsə də, elektron nasazlıqlar barədə çoxsaylı şikayətlər var.
“Bəzi sürücülər "Compass"da sensor nasazlıqlarından şikayətləniblər — məsələn, kruiz-kontrolun qeyri-sabit işləməsi və ya yağışsız havada şüşəsilənlərin işə düşməsi. Belə texniki problemlər icarə təcrübəsini mənfi təsirləndirir. Xoşbəxtlikdən, icarə parklarında etibarlı sürüş təmin edən digər SUV modellər də mövcuddur”, deyə "Slashgear" qeyd edir.
"Chrysler Pacifica"
Bu model ailəvi və qrup səyahətləri üçün münasib, geniş və iqtisadi avtomobildir. Lakin etibarlılıq baxımından öz sinfində lider sayılmır.
“Toyota Sienna" və "Kia Carnival" kimi modellər daha etibarlı hesab olunur. "Pacifica" haqqında ən çox rast gəlinən şikayətlərdən biri onun texniki və əyləncə sistemlərinin nasazlığıdır. Bəzi sürücülər bildiriblər ki, bəzən alətlər panelindəki rəqəmsal ekran və ya multimedya ekranı sönür”, deyə məqalədə xəbərdarlıq edilir.
Bu isə sürüş zamanı təhlükə yarada bilər, çünki yanacaq səviyyəsini və ya avtomobilin texniki vəziyyətini ancaq təxminlə müəyyənləşdirmək lazım gəlir.(valyuta.az)
