ain.az xəbər verir, Bizimyol saytına əsaslanaraq.
Qeysəriyyə əməliyyatı bir çox qadın üçün həyatın ən önəmli, amma eyni zamanda ən çətin təcrübələrindən biridir. Bəziləri bu üsulu “asan doğuş” kimi qəbul etsə də, reallıqda vəziyyət tam fərqlidir.
Həkimlərin sözlərinə görə, qeysəriyyə əməliyyatı cərrahi müdaxilədir və onun həm fiziki, həm də psixoloji fəsadları ola bilər. Doğuşun bu üsulla həyata keçirilməsi yalnız tibbi zərurət olduqda tövsiyə olunur.
Son illər gənc analar arasında “qeysəriyyə ilə doğuş daha rahatdır” fikri geniş yayılıb. Bəziləri ağrıdan qorxduğu, bəziləri vaxt planlamasına görə bu üsulu seçir. Lakin təbiətin yaratdığı mexanizmi kəsməklə əvəzləmək nə orqanizm, nə də psixoloji vəziyyət üçün asan deyil.
Cərrahiyyə əməliyyatı zamanı qadının bədəninə kəsik atılır, daxili orqanlar müəyyən müddətlik açılır və bu, həm qan itkisinə, həm də bərpa dövrünün uzanmasına səbəb olur. Qeysəriyyə əməliyyatından sonra qadının tam sağalması bəzən həftələrlə, hətta aylarla çəkir.
Təbii doğuş zamanı qadın orqanizmi oksitosin adlı “xoşbəxtlik hormonu” ifraz edir. Bu hormon həm ana ilə körpə arasında ilkin bağın yaranmasına, həm də süd ifrazına təsir göstərir. Qeysəriyyə əməliyyatında isə bu proses süni şəkildə tənzimlənir, nəticədə bəzən emosional boşluq və “ana olma hissinin çatışmazlığı” yarana bilir.
Psixoloqlar bildirirlər ki, bu, doğuşdan sonrakı depressiyanın daha çox rast gəlindiyi hallardan biridir.
Əlbəttə, elə vəziyyətlər var ki, qeysəriyyə yeganə və doğru seçimdir. Məsələn, körpənin tərs yerləşməsi, nəbzin zəifləməsi, dölün iri olması və ya ananın təzyiq, ürək-damar problemi kimi halları. Belə hallarda bu əməliyyat ana və körpənin həyatını xilas edir. Amma tibbi göstəriş olmadan sadəcə “rahatlıq” naminə bu üsula müraciət etmək, qadının gələcək sağlamlığını risk altına sala bilər.
Qeysəriyyə əməliyyatı tibbin böyük nailiyyətidir, amma “asan yol” deyil. Bu üsul, bəzən həyatı qorumaq üçün zərurət, bəzən isə bədənin və ruhun sınağıdır.
Ən önəmlisi odur ki, hər bir qadın doğuş üsulunu seçərkən sosial təzyiqə deyil, həkim məsləhətinə güvənsin. Çünki ana olmaq üsuldan asılı deyil, ana olmaq sevgi, fədakarlıq və həyatın özüdür.
Leyla Mirzə, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
