İsrailin baş naziri Benyamin Netanyahu ABŞ prezidenti Donald Trampa zəng edib. Onlar HƏMAS-ın əlində olan bütün israilli girovların azad edilməsinə dair sazişin imzalanmasının "tarixi nailiyyəti" münasibətilə bir-birlərini təbrik ediblər...
Poliqon xəbər verir ki, bu barədə X sosial media platformasında İsrail baş nazirinin ofisi məlumat yayıb.
Donald Tramp söhbətin təfərrüatlarını danışıb. "Netanyahu zəng etdi. O dedi: "İnana bilmirəm ki, indi hamı məni bəyənir". Dedim ki, daha da önəmlisi, hamı yenidən İsraili sevir və bu doğrudur: "İsrail bütün dünya ilə döyüşə bilməz, Bibi, bütün dünya ilə döyüşə bilməz". Və o, bunu çox yaxşı başa düşür, buna görə də hər şeyin bir araya gəlməsi heyrətamizdir", deyə Amerika prezidenti Fox News-a müsahibəsində bildirib.
Donald Tramp söhbəti gözəl adlandırıb: "O, çox xoşbəxtdir. Və haqlı olaraq belə olmalıdır. Bu, böyük nailiyyətdir. Bütün dünya bu razılaşmanı etmək üçün bir araya gəldi, o cümlədən keçmiş düşmən olan ölkələr".
İsrail və HƏMAS dünən Qəzza münaqişəsinin həllinə dair razılaşmanın birinci mərhələsinə razılaşıblar. Oktyabrın 13-də fələstinlilər girovları azad etməlidir. İsrail də öz növbəsində Qəzzadan qoşunlarını "razılaşdırılmış xətt"ə çəkməlidir.
Poliqon.info
