ain.az, Azertag portalından verilən məlumatlara əsaslanaraq xəbər verir.
Roma, 30 sentyabr, AZƏRTAC
Milan Şəhər Bələdiyyə Şurası “San-Siro” kimi məşhurlaşan “Giuseppe Meazza” stadionunun və ətraf ərazilərin “İnter” və “Milan” klublarına satılması ilə bağlı qərarı müzakirə etməyə başlayıb.
AZƏRTAC xəbər verir ki, “San-Siro”nun gələcəyi ilə bağlı qərarda konsensus əldə olunması və satışa “hə” cavabının çıxması gözlənilir. Şuranın iclası qeyri-müəyyən müddətə çağırılıb.
Ümumilikdə 1,2 milyard avroluq layihə çərçivəsində stadionda təmir-bərpa işlərinin aparılması və tamaşaçı tutumunun artırılması nəzərdə tutulur. Yeni stadionun 2031-ci ilədək hazır olması planlaşdırılır.
Qeyd edək ki, stadionunun gələcəyinə dair “İnter” və “Milan” klubları arasında aparılan danışıqlar fonunda yaranan qeyri-müəyyənlik səbəbindən UEFA 2027-ci ildə Milanda keçiriləcək Çempionlar Liqasının finalını ləğv edib.
Milan şəhərinin iki futbol klubu - “İnter” və “Milan” ev oyunları və digər turnirlər üzrə matçlarını “San-Siro” stadionunda keçirir. 1926-cı ildə istifadəyə verilmiş “San-Siro” 75 mindən çox tamaşaçı tutumu ilə onu İtaliyanın ən böyük stadionudur və Avropada isə ən böyük stadionlardan biridir.
Nihad Budaqov
AZƏRTAC-ın xüsusi müxbiri
Roma
Ən son xəbərləri və yenilikləri almaq üçün ain.az saytını izləyin.
