Olaylar.az xəbər verir ki, bunu bu gün Bakıda keçirilən Avrasiya Universitetləri Sammitində çıxışı zamanı Azərbaycan təhsil naziri Emin Əmrullayev bildirib.
Onun sözlərinə görə, son on ildə ölkə universitetlərinə qəbul olunan tələbələrin illik sayı 27 mindən 60 min nəfərə yüksəlib.
"Hər bir insanın təhsilini davam etdirmək imkanı olmalıdır. Təhsil yalnız elitanın imtiyazı olmamalıdır. Lakin tələbələrin sayının artması fonunda biz keyfiyyətlə bərabərlik arasında balans tapmalıyıq", -deyə nazir vurğulayıb.
İqtisadi aspektlərə toxunan Əmrullayev qeyd edib ki, universitetlər yalnız təhsil müəssisələri deyil, həm də inkişafın hərəkətverici qüvvəsidir. "Tədqiqat və innovasiya sahəsində əməkdaşlıq olduqca vacibdir, xüsusilə iqtisadiyyatlarımızın və sistemlərimizin müxtəlifliyini nəzərə alaraq. Bu cür tərəfdaşlıqlar ictimai fayda gətirməli, insanların həyatını yaxşılaşdırmalı və tam şəkildə dayanıqlı inkişaf məqsədlərinə uyğun olmalıdır",- deyə o əlavə edib.
Nazirin sözlərinə görə, Azərbaycan ali təhsil sahəsində regional və qlobal əməkdaşlığı dayanıqlığın möhkəmləndirilməsi, innovasiyaların dəstəklənməsi və təhsil sistemlərinin uzunmüddətli iqtisadi inkişafa birbaşa töhfə verməsinin təmin olunması üçün zəruri şərt hesab edir.
Əmrullayev tələbələrin beynəlxalq mobilliyinin əhəmiyyətini vurğulayaraq, ali təhsil sahəsində əməkdaşlığın qarşılıqlı fayda əldə etməyə yönəlməsinin vacibliyini qeyd edib.
Nazir əlavə edib ki, tədqiqat və innovasiya istiqamətində əməkdaşlıq ictimai fayda gətirməli, insanların həyat keyfiyyətinin yüksəlməsinə xidmət etməli və dayanıqlı inkişaf məqsədlərinə uyğun olmalıdır.
