Olaylar.az xəbər verir ki, bunu BMT Baş Assambleyasının 80-ci sessiyasının ümumi müzakirələrində çıxış edən prezident Cozef Aun deyib:
"Biz İsrailin hücumlarına dərhal son qoyulmasını və işğalçı qüvvələrin Livan torpaqlarından çıxarılmasını tələb edirik. Biz beynəlxalq ictimaiyyətə vəziyyətin sabitləşdirilməsində yardım və qeyri-hökumət qruplarının tərksilah edilməsi planının həyata keçirilməsi üçün səylərin dəstəklənməsi ilə bağlı müraciət edirik".
Onun sözlərinə görə, Livan Silahlı Qüvvələrinə missiyasını yerinə yetirmək üçün lazımi köməklik göstərilməlidir. Aun izah edib ki, hökumətin avqustun 5-də ölkədəki bütün silahları ordunun əlində cəmləşdirmək qərarı "dövlətin suverenliyini gücləndirmək və vətəndaşların hüquqlarını qorumaq məqsədi daşıyır".
Prezident qeyd edib ki, Livanın və bütün Yaxın Şərqin təcrübəsi "konfliktlərin xalqların inkişafına və firavanlığına mane olduğunu, xaosa, yoxsulluğa və geridə qalmış inkişafa gətirib çıxardığını göstərir": "Sülh tərəqqi üçün yeganə münbit torpaqdır; onsuz ədalət və ləyaqətli həyat yoxdur".
