Yeni Zelandiyada iki övladını öldürərək meyitlərini illərlə çamadanlarda saxlayan qadın məhkəmə qarşısında təqsirli bilinib.
Far.Az xarici KİV-ə istinadən xəbər verir ki, Oklend Ali Məhkəməsində keçirilən iclasda hakimlər 45 yaşlı Hakuyun Linin "psixi vəziyyətim normal deyil" müdafiəsini rədd edib.
İttihama görə, Li 2018-ci ilin iyununda 6 yaşlı Minu Co və 8 yaşlı Yuna Conu qətlə yetirib. Uşaqların qalıqları yalnız 2022-ci ilin avqustunda, Oklenddə tərk edilmiş anbar sahəsindəki çamadanların içindən tapılıb.
Məlumata əsasən, qadın hadisədən sonra Cənubi Koreyaya gedərək adını dəyişib, lakin 2022-ci ildə geri ekstradisiya olunaraq məhkəmə qarşısına çıxarılıb.
Prokurorluq bildirib ki, cinayətlər Li həyat yoldaşını xərçəngdən itirdikdən yeddi ay sonra baş verib. O, ittihamı rədd etsə də, münsiflər onun psixi durumla bağlı iddialarını qəbul etməyib.
Uşaqların meyitlərinin üzə çıxmasına isə qadının illərlə icarəyə götürdüyü anbarın ödənişini edə bilməməsi səbəb olub. Anbar əşyaları hərraca çıxarıldıqdan sonra çamadanları alan şəxslər dəhşətli mənzərə ilə üzləşiblər.
Hakim Cefri Veninqin qərarı ilə Li noyabrın 26-da hökm oxunana qədər həbsdə saxlanılacaq. Yeni Zelandiya qanunlarına əsasən, qətl ömürlük həbs cəzası nəzərdə tutur və ən azı 10 il həbsdə qalmadan şərti azadlığa buraxılma mümkün deyil.
Məhkəmə prosesləri zamanı Li-ə sağlamlıq vəziyyətinə görə digər otaqdan iştirak icazəsi verilsə də, hökm elan edilən gün məhkəmə zalında başı aşağı və üzü saçlarının arxasında gizlənmiş halda olub.
