BAKI, 22 sentyabr. TELEQRAF
“ABŞ Mərkəzi Asiyada Rusiya və Çinin təsir imkanları yaradan informasiya müharibəsində təslim olub”.
Teleqraf xəbər verir ki, bunu ABŞ-nin Özbəkistandakı keçmiş səfiri Daniel Rosenblum deyib.
Diplomat Rusiyanın region ölkələrində - Tacikistan, Qırğızıstan, Qazaxıstan, Türkmənistan və Özbəkistanda amansızcasına dezinformasiya kampaniyası apardığını bildirib.
Rosenblum digər məsələlərlə yanaşı, 2023-cü ildə Rusiya mediasının Qazaxıstanda NATO bazasının açıldığını iddia etdiyi xəbərini xatırladıb. O əlavə edib ki, əslində Qazaxıstan o zaman Sülh Quruculuğu İnstitutu üçün ABŞ tərəfindən maliyyələşdirilən konfrans mərkəzinin lentini kəsmişdi:
“Belə gülünc fikirlə zarafat etmək asan olsa da, adətən Rusiyanın bu cür informasiya əməliyyatlarının arxasında çox ciddi niyyətləri dayanır”.
Keçmiş səfir ABŞ-nin Mərkəzi Asiyaya o qədər də diqqət ayırmadığını iddia edib:
“Trampın ikinci administrasiyasından 8 ay sonra aydın olur ki, Mərkəzi Asiyada informasiya müharibəsi başa çatıb - ona görə yox ki, Rusiya qalib gəlib, biz sadəcə təslim olmuşuq. Alçaldılmış və nüfuzdan düşmüş Amerika zəif Amerikaya çevrilir”.
Rosenblum həmçinin regiona kapital, infrastruktur və dil proqramları gətirən “Bir Kəmər, Bir Yol” təşəbbüsü vasitəsilə Çinin artan rolunu vurğulayıb. O etiraf edib ki, Çin dostluq və insanlara təsir etmək baxımından çox yaxşı işlər görür.
