Milli Məclisin deputatı Sevinc Fətəliyeva Suverenlik həmişə dövlətin mövcudluğunun əsası olub və qalmaqdadır. Azərbaycan üçün bu anlayış yalnız hüquqi kateqoriya deyil, həm də azadlıq və müstəqillik uğrunda mübarizə tarixi ilə sıx bağlı olan milli ideyadır. Əsrlər boyu xarici təhdidlər, işğallar və çətinliklərlə üzləşməsinə baxmayaraq, xalq daim müstəqillik arzusu ilə yaşayıb. Bu gün ölkənin müstəqilliyi və ərazi bütövlüyü, qəhrəmanların və şəhidlərin canı bahasına qazanılmış ali milli dəyərə çevrilib. 20 sentyabrın Dövlət Suverenliyi Günü kimi təsis olunması otuz illik mübarizə yolunun məntiqi yekunu oldu. Bu qərar yalnız müstəqilliyin və ərazi bütövlüyünün hüquqi-siyasi baxımdan tam bərpasını təsdiqləmədi, eyni zamanda milli birliyin və Azərbaycan dövlətçiliyinin dayanıqlılığının rəmzinə çevrildi. Otuz ildən artıq müddətdə Azərbaycan torpaqları işğal altında qaldı. Ermənistan beynəlxalq hüququ pozdu, etnik təmizləmə həyata keçirdi, şəhərləri və kəndləri dağıtdı, mədəni irsi məhv etdi və Xocalı soyqırımı da daxil olmaqla bəşəriyyətə qarşı cinayətlər törətdi.Buna baxmayaraq, beynəlxalq ictimaiyyət Qarabağı Azərbaycanın tərkib hissəsi kimi tanımaqda davam edirdi, xalq isə torpaqları uğrunda mübarizəsini dayandırmırdı. Dönüş nöqtəsi 2020-ci ildə baş verdi. 44 günlük Vətən müharibəsi ölkəyə tarixi qələbə qazandırdı. Geniş ərazilər işğaldan azad olundu. Daha sonra Laçın dəhlizinə nəzarətin bərpası və 2023-cü il sentyabrın 19–20-də keçirilən lokal antiterror tədbirləri nəticəsində Azərbaycanın suverenliyi tam şəkildə təmin olundu. Qanunsuz silahlı dəstələr zərərsizləşdirildi, ölkə ərazisinin hər qarışında Konstitusiyanın qüvvəsi bərpa edildi. 20 sentyabr yalnız hərbi qələbənin tarixi deyil, həm də yeni bir dövrün başlanğıcıdır. Bu tarix bu gün bir neçə mühüm mənanı ehtiva edir: beynəlxalq hüququn təntənəsi, Cənubi Qafqazda yeni təhlükəsizlik arxitekturasının formalaşması və milli kimliyin möhkəmlənməsi. Azərbaycan, BMT Təhlükəsizlik Şurasının qətnamələrini reallaşdırmaqla, beynəlxalq vasitəçilərin otuz il ərzində edə bilmədiyini təkbaşına həyata keçirdi. Bu, təkcə sərhədlərin bərpası deyil, həm də region üçün sülh və əməkdaşlıq modelinin təqdim edilməsidir. Qələbə siyasi olduğu qədər də mənəvi zəfər idi və cəmiyyətin öz gücünə və gələcəyinə inamını gücləndirdi. Bu gün azad edilmiş torpaqlar yalnız bərpa olunan bölgələr deyil, həm də yeni diplomatik arenaya çevrilir. Dünənə qədər münaqişə ilə assosiasiya olunan Xankəndi bu gün beynəlxalq əməkdaşlığın mərkəzidir. İqtisadi Əməkdaşlıq Təşkilatının sammitinin burada keçirilməsi bu prosesin bariz sübutudur. Şuşa və Xankəndi unikal tandem yaradır: biri mədəni irsi simvolizə edir, digəri isə yeni diplomatik perspektivləri. Bu şəhərlərdə diplomatiya ilə mədəniyyətin vəhdəti Azərbaycanın keçmişi ilə gələcəyini birləşdirən yeni inkişaf fəlsəfəsinin əsasını qoyur. Xankəndi və Şuşada keçirilən beynəlxalq forumlar, görüşlər və təşəbbüslər göstərir ki, Azərbaycan hərbi qələbəsini davamlı siyasi və diplomatik uğura çevirə bilmişdir. Prezident İlham Əliyevin vurğuladığı kimi, formalaşan yeni reallıqlar regionun maraqlarına cavab verir və uzunmüddətli sülh və əməkdaşlıq üçün yeni imkanlar yaradır. Azad olunmuş torpaqların dialoq və əməkdaşlıq meydanına çevrilməsi, Azərbaycanın Cənubi Qafqazın əsas aktoru və beynəlxalq təşkilatlar üçün etibarlı tərəfdaş kimi tanınmasının göstəricisidir. Bu gün Dövlət Suverenliyi Günü sadəcə xatirə günü deyil. Bu, Azərbaycanın tam suverenliyə nail olduğu, milli birliyin möhkəmləndiyi və inamlı inkişaf mərhələsinə qədəm qoyduğu tarixi bir siyasi reallığı əks etdirir. 2025-ci ilin Konstitusiya və Suverenlik İli elan olunması da təsadüfi deyil. Bu, dövlət siyasətinin əsas dayaqlarını – sabitliyi, qanunun aliliyini və tərəqqini – simvolizə edən dəyərlərin rəmzidir. Beləliklə, 20 sentyabr yalnız keçmişin xatirəsi deyil, eyni zamanda gələcəyin strateji yol göstəricisidir. Bu gün Azərbaycan bütün dünyaya sübut edir ki, yalnız suverenlik, milli birlik və quruculuq yolu dövlətin həqiqi gücünü və davamlı inkişafını təmin edə bilər.
