Bəzi amerikalı turistlər xaricdə Amerika əleyhinə reaksiyalardan yayınmaq üçün çamadanlarına Kanada bayrağı tikərək özlərini kanadalı kimi təqdim edirlər. “Flag jacking” adlanan bu təcrübə Kanadada tənqidlərə səbəb olub.
New York ştatından olan Çelsi Metscer Dominikan Respublikasında istirahət edərkən özünü kanadalı kimi təqdim edib.
Metscer bir Fransız-Kanadalı barda ABŞ–Kanada xokkey matçını izləyərkən “USA” qışqırdığı üçün kanadalı bir cütlüyün sərt reaksiyası ilə qarşılaşdığını və sonrasında taksi sürücüsü tərəfindən amerikalı olduğu üçün götürülmədiyini deyərək bir neçə həftə boyunca kanadalı olduğunu söylədiyini bildirib.
Oxşar şəkildə Yunanıstanda istirahət edən Miçiqanlı iki gənc qadın da amerikalı olduqları anlaşılanda ters baxışlarla üzləşdiklərini, buna görə də ofisianta özlərini kanadalı kimi təqdim etdiklərini bildiriblər.
Lakin Kanada haqqında suallara cavab verə bilmədikdə yalanları ortaya çıxıb.
Kanadalı mədəniyyət şərhçisi Tod Maffin sosial mediada paylaşdığı videoda bu təcrübəni “mədəni oğurluq və saxtakarlıq” adlandırıb. “Kanada bir ölkədir, kostyum dükanı deyil. Bayrağımız görünməzlik pərdəsi deyil” deyən Maffin hətta liberal və ya müxalif amerikalıların belə bu üsula əl atmasının yanlış olduğunu vurğulayıb.
Toronto Universitetindən siyasət elmləri professoru Robert Şerzer isə Tramp idarəsinin ticarət müharibələri, Kanadanı 51-ci ştat etmək təhdidləri və Castin Trüdoya yönəlmiş təhqiredici açıqlamalarının Kanadalı millətçiliyini artırdığını qeyd edib.
Kanadada Amerika milli marşının lağa qoyulması, ABŞ məhsullarına qarşı boykot kampaniyaları və “Kanada malını al” şüarları getdikcə güclənir. Baş nazir Castin Trüdo da ölkə kimliyini amerikalı olmamaq üzərindən müəyyən etdiklərini bildirmişdi.
Kanadalılar amerikalıların Kanada bayrağını özlərinə qalxan kimi istifadə etməsini ölkənin dünya üzrə müsbət imicinə zərər verən, özünə güvənli və aldadıcı davranış hesab edirlər.
