Əvvəllər Milli Məclisdə "İncil oxumuş insanlarla" Eçmiədzinə gedəcəyini və "ruhani məclis" yaradacağını deyən Paşinyan, indi bu ideyanı konkret plana çevirib.
Ruhaninin sözləri əsas olacaq
Qəzetin məlumatına görə, hakimiyyət keşiş Aram Asatryanın sözlərindən istifadə etməyi planlaşdırır. Keşiş Asatryan, Kilsədə onlara təzyiq edildiyini və müxalifətin mitinqlərinə qatılmağa məcbur edildiklərini bildirərək narazılığını dilə gətirib.
Paşinyanın planına əsasən, bu bəyanatlar "ruhanilərin hüquqlarının qorunması" kimi təqdim ediləcək və Katolikosun öz tabeliyində olanlara təzyiq etdiyi, dövlətin isə kilsəni Katolikosdan qorumalı olduğu iddiası irəli sürüləcək.
Ssenari və gələcək addımlar
Əgər II Qaregin keşiş Aramı danlasa və ya vəzifəsindən azad etsə, bu Paşinyan üçün "əsl hədiyyə" olacaq. Belə bir addım cəza kimi qəbul ediləcək və hakimiyyət bundan istifadə edərək, "ruhani məclis" və ya "ruhani söhbət" adı altında Katolikosun rəsmi iqamətgahına (Veharan) hücum edəcək.
"Joxovurd"un məlumatına görə, hakimiyyət dairələrində bu ssenari Vətəndaş Müqaviləsi Partiyasının idarə heyəti seçkilərindən sonra, lakin növbəti parlament seçkilərindən əvvəl həyata keçiriləcək böyük bir siyasi addım kimi qiymətləndirilir.
Partiya keşiş Aramı Katolikosun "locum tenens" (müvəqqəti rəhbər) təyin etməyi planlaşdırır, çünki o, evli keşişdir. Bundan sonra isə yeni Ümumerməni Patriarxı seçkilərinin təşkili nəzərdə tutulur.
