BAKI, TurkicWorld
«Axios» saytının verdiyi məlumata görə, senator Lindsi Qraham bildirib ki, Suriya xarici işlər naziri Əsəd əş-Şeybani bu həftə Vaşinqtonda ABŞ qanunvericiləri ilə görüşəcək. Görüşdə ölkəsinə tətbiq olunan qalan Amerika sanksiyalarının qaldırılması müzakirə olunacaq.
Şeybaninin səfəri – son 25 ildən artıq müddətdən sonra Suriyanın xarici işlər nazirinin Vaşinqtona ilk gəlişi hesab olunur. Səfər Suriyanın prezidenti Əhməd əş-Şəraanın dünən verdiyi açıqlamadan sonra baş tutur. O bildirmişdi ki, İsraillə aparılan təhlükəsizlik sazişi üzrə danışıqlar yaxın günlərdə nəticə verə bilər.
Qraham «Axios»a açıqlamasında deyib ki, o və Senatın digər üzvləri bu gün (cümə axşamı) Şeybani ilə görüşərək «Sezar Qanunu» kimi qanunlara əsasən tətbiq olunan müəyyən sanksiyaların müzakirəsini aparacaq və onların daimi olaraq ləğvini nəzərdən keçirəcəklər.
Məlumata görə, Şeybani sabah (cümə günü) ABŞ dövlət katibi Marko Rubio ilə də görüşəcək.
Qraham əlavə edib ki, əgər Suriya rəsmi olaraq İsraillə yeni təhlükəsizlik sazişinin imzalanmasına doğru addım atarsa və İŞİD-ə qarşı yaradılan koalisiyaya qoşularsa, o, bu sanksiyaların ləğvini dəstəkləyəcək.
Hazırda Suriya və İsrail, Dəməşqin ümid etdiyi kimi, İsrailin hava hücumlarını dayandırması və cənub Suriyaya daxil olmuş qüvvələrini geri çəkməsi ilə nəticələnəcək bir saziş üzərində danışıqlar aparır.
Qeyd edək ki, Vaşinqton dünya liderlərinin gələn həftə Nyu-Yorkda BMT Baş Assambleyasında toplaşmasından öncə Suriyanı razılığa gəlməyə təzyiq göstərir.
Lakin prezident Əhməd əş-Şəraa bu iddianı təkzib edib və bildirib ki, ABŞ Suriyaya təzyiq göstərmir, yalnız vasitəçi rolunu oynayır.
Onun sözlərinə görə, İsrail 8 dekabrdan – müxalifətin hücumu nəticəsində keçmiş prezident Bəşşar Əsədin devrilməsindən sonra – Suriyaya min dəfədən çox hava zərbəsi endirib və 400-dən artıq quru basqını həyata keçirib.
Qeyd edək ki, ABŞ prezidenti Donald Tramp bu ilin əvvəlində Suriyaya tətbiq olunan əsas Amerika sanksiyalarının bir qisminin ləğv olunduğunu açıqlamışdı.
