Bu ilin ilk səkkiz ayın nəticələrinə əsasən, Çin - Mərkəzi Asiya beynəlxalq dəmir yolu yükdaşıma marşrutları üzrə hərəkət edən yük qatarlarının sayı illik müqayisədə 22,7 faiz artaraq 9626 qatar təşkil edib.
Hafta.az-ın yazdığına görə, hesabat dövründə bu qatarlarla 751 min standart konteyner /TEU, iyirmi fut ekvivalent vahid/ daşınıb ki, bu da bir il əvvəlkindən 31,1 faiz çoxdur.
Qeyd edək ki, cari il avqustun 31-nə olan məlumata görə, müvafiq xidmətlər fəaliyyətə başlayandan bəri Çin-Mərkəzi Asiya yük qatarları ümumilikdə 69 mindən çox reys həyata keçirib, 5,19 milyon TEU yük daşıyıb.
Çin-Laos Dəmir Yolu, Transxəzər Beynəlxalq Nəqliyyat Dəhlizi və digər logistika kanallarının fəaliyyəti sayəsində Çin-Mərkəzi Asiya yük qatarı xidmətləri hazırda Çinin 128 prefektura səviyyəli şəhərini, eləcə də digər 11 Asiya ölkəsinin 100-dən çox şəhərini əhatə edir.
Hazırda bu qatarlar 22 növ məhsul, o cümlədən yeni enerji daşıyıcıları, fotoelektrik məhsullar və mexaniki avadanlıqlar daşıyır. Onlar Orta Asiyadan pambıq iplik, sürmə filizi, dənəvər buğda kəpəyi və arpa, eləcə də Cənub-Şərqi Asiyadan tropik meyvələr, gübrələr və dəmir filizi gətirir, Çin istehsalı isə elektrik avtomobilləri, fotovoltaik komponentlər, elektronika və məişət əşyaları Asiyanın bir çox ölkə və regionlarında bazarlara çıxır.
Bu arada, Çin Baş Gömrük İdarəsinin (GAC) məlumatlarına görə, 2014-cü ilin oktyabrında Çin-Avropa yükdaşıma xidmətlərinin fəaliyyətə başlamasından bəri Çin-Avropa beynəlxalq dəmir yolu yük marşrutları üzrə Hunan əyalətinin inzibati mərkəzi Çanşadan göndərilən yük qatarlarının ümumi sayı sentyabrın 10-u tarixinə 6 mini ötüb.
GAC-ın rəsmi saytında yerləşdirilən məlumata görə, göstərilən müddət ərzində Çanşadan təxminən 118,21 milyard yuan (təxminən 16,61 milyard dollar) dəyərində mallarla dolu 520 mindən çox standart konteyner (TEU) daşıyan 6247 Çin-Avropa yük qatarı göndərilib.
Hazırda Çanşanın Avrasiya qitəsinin 100 regionunu və 30 ölkəsini əhatə edən 12 müntəzəm marşrutu var. Daşınan yüklərin çeşidi əsas gündəlik mallar və texniki vasitələrdən tutmuş, tikinti texnikasına, avtomobillərə və onların ehtiyat hissələrinə qədər getdikcə genişlənir. Çin-Avropa yük qatarı xidmətləri Hunan və onun qonşu bölgələrindəki müəssisələrin xarici bazarlara çıxması üçün daha əlverişli şərait və daha çox imkanlar yaradıb, “Bir kəmər, bir yol”un tikintisinə və beynəlxalq təchizat zəncirinin sabitləşməsinə mühüm dəstək verib.
